O delegado do Goberno en Galicia, Pedro Blanco, destacou hoxe que Galicia consolida a súa posición como a segunda comunidade máis segura de España, segundo os últimos indicadores de seguridade correspondentes ao segundo trimestre de 2026. Galicia pechou xuño cunha taxa de criminalidade de 35,3 infraccións penais por cada 1.000 habitantes, fronte ás 50,5 da media nacional.
Pedro Blanco puxo en valor uns datos que, sinalou, “confirman que Galicia é unha terra segura para vivir, traballar e desenvolver calquera actividade económica”, e vinculou estes resultados co traballo diario dos Corpos e Forzas de Seguridade e co reforzo dos seus medios humanos.
Así, entre xaneiro e xuño rexistráronse 47.260 infraccións penais, un 0,2% menos que no mesmo período de 2025. A cibercriminalidade mantén a tendencia descendente iniciada no primeiro trimestre e baixa un 1,9%, ata os 12.895 ciberdelitos. Dentro dela, as estafas informáticas descenden un 1,2% e o resto de ciberdelitos, un 6,2%.
No ámbito da criminalidade convencional, os datos permanecen estables e sen apenas variación con respecto ao trimestre anterior. Con todo, os furtos baixan un 6,3%; os roubos con violencia ou intimidación, un 8%; e os delitos contra a liberdade sexual, un 3%. Os homicidios e asasinatos en grao de tentativa redúcense un 37,1%.
Por provincias, A Coruña presenta unha taxa de criminalidade de 38,2 infraccións por cada 1.000 habitantes; Lugo, 29,4; Ourense, 31,3; e Pontevedra, 35,2.
Máximo histórico de axentes
O delegado salientou tamén o reforzo dos Corpos e Forzas de Seguridade do Estado en Galicia, que alcanzan en xuño os 8.929 axentes dispoñibles de Policía Nacional e Garda Civil, a cifra máis elevada da serie recollida no informe. Son 581 efectivos máis que en 2019, un incremento do 7%. En concreto, Policía Nacional conta con 3.546 efectivos, un 10,6% máis que en 2019, e Garda Civil con 5.383, un 4,7% máis.
Pedro Blanco destacou que este incremento “demostra con feitos o compromiso do Goberno coa seguridade de Galicia, reforzando os cadros de persoal e dotando aos profesionais dos recursos necesarios para desenvolver o seu traballo”.
Xunto á evolución da criminalidade, o delegado incidiu na mellora da eficacia policial. A porcentaxe de infraccións penais esclarecidas elévase ata o 45,9% no primeiro semestre de 2026, fronte ao 44,6% do mesmo período de 2025.
Pedro Blanco felicitou aos homes e mulleres da Policía Nacional e da Garda Civil destinados en Galicia e asegurou que estes datos “son resultado da súa profesionalidade e do seu compromiso diario coa cidadanía”. “Seguiremos traballando, con máis efectivos, máis medios e máis coordinación, para que Galicia continúe sendo unha das comunidades máis seguras de España”, concluíu.










