O presidente da Deputación da Coruña, Valentín González Formoso, e a presidenta da asociación Ecos do Sur, Ana Ulloa, asinaron hoxe un convenio de cooperación para coordinar actuacións de acollida e atención a persoas menores solicitantes de asilo no marco do Sistema Nacional de Acollida de Protección Internacional.
A Deputación da Coruña acolle desde o pasado setembro na Residencia do IES Rosalía Mera da Coruña a 15 menores refuxiados procedentes da guerra de Mali, un conflito que está a provocar unha grave crise humanitaria no continente africano. Trátase de nenos e nenas con idades comprendidas entre os 9 e os 15 anos que chegan a Galicia tras o auto do Tribunal Supremo que lles outorga o acceso e permanencia no Sistema Nacional de Acollida de Protección Internacional.
A acollida realízase no marco dun dispositivo de emerxencia coordinado pola Secretaría de Estado de Migracións, dependente do Ministerio de Inclusión, Seguridade Social e Migracións, coa colaboración da entidade social Ecos do Sur, organización sen ánimo de lucro con sede na Coruña e entidade federada da Red Acoge.
Mediante este convenio, a Deputación da Coruña pon á disposición da rede estatal de acollida un dos espazos rehabilitados da antiga residencia Rosalía Mera, adaptado para ofrecer unha atención temporal e integral aos menores. O centro proporciona aloxamento, manutención, apoio psicolóxico e acompañamento social, co obxectivo de garantir unha acollida digna e segura nun momento de especial vulnerabilidade.
Valentín González Formoso destacou que “a Deputación da Coruña ten a obriga moral de colaborar ante unha crise humanitaria desta magnitude, especialmente cando se trata de menores que foxen da violencia e da guerra”. O presidente provincial subliñou que a institución “ponse ao servizo da solidariedade e da defensa dos dereitos humanos, colaborando co Estado para dar unha resposta eficaz e humana”.
Ecos do Sur será a entidade encargada da xestión do programa de acollida, cun equipo técnico especializado que prestará atención continuada ás persoas menores acollidas, incluíndo acompañamento social, atención psicolóxica e apoio educativo, en coordinación cos servizos públicos.
O convenio ten vixencia ata o 28 de febreiro de 2026, con posibilidade de prórroga, consolidando así o compromiso da institución provincial coa acollida e protección das persoas refuxiadas.
