O talento galego emerxente subirase un ano máis ao escenario do Atlantic Pride coruñés. Este verán, o ‘Orgullo do Norte’ contará coa ‘boa vibra’ de bandas e artistas como arde, Jonydasvie, Montedapena, raze e Terrae Dj’s durante a celebración da súa sétima edición, que terá lugar do 5 ao 12 de xullo. Power pop, pop-punk, pop urbano, World Music, electrónica, músicas de baile e sons de raíz encherán o escenario da súa man. Non faltarán á cita formatos híbridos, performance, danza e impactantes proxeccións audiovisuais. Así, este novo talento galego súmase aos nomes previamente confirmados no Atlantic Pride 2026: Miriam Rodríguez, Whigfield e Choriza May. Moi pronto, o festival avanzará novas confirmacións.
Un ano máis, no programa do ‘Orgullo do Norte’ terán cabida grandes figuras pop de hoxe e de sempre, coloridas actuacións de drags, pinchadas de dj’s de referencia da escena galega e estatal e a celebración dun Certame Literario de Literatura LGTBIQ+. O Atlantic Pride é un festival pioneiro, gratuíto e inclusivo nacido na cidade da Coruña no ano 2019, destinado a reivindicar a liberdade afectiva, sexual e de identidade dende unha perspectiva lúdica e inclusiva, con propostas musicais para todos os públicos. A cita está impulsada pola Asociación Orgullo Coruña (ORCO) e conta co patrocinio institucional do Concello da Coruña, ademais do apoio da Deputación da Coruña e o patrocinio privado de Estrella Galicia, Coruña The Style Outlets e Globalgrafic.
SOBRE ARDE
arde son cinco amigas que fan powerpop, mesturando guitarras afiadas, baixos potentes e letras que queiman. Nas súas cancións gústalles facer reflexión social e contar historias sobre a identidade e o mundo que as rodea. O obxectivo do grupo é claro: sacar todo aquilo que lles arde por dentro, de aí o seu nome. Máis en https://www.arde.band/.
SOBRE JONYDASVIE
Jonydasvie, nome artístico de Jonathan Dasilva Vieira, é un cantante e compositor galego nacido en Lourenzá. Desde pequeno mostrou unha forte paixón pola música, participando en concursos e en programas da TVG como Luar e Bamboleo, onde comezou a definir o seu estilo.
Ao longo da súa traxectoria interpretou temas propios en televisión e formou parte de orquestras como Venezia. En 2022 presentouse ao Benidorm Fest coas cancións Más e Me da lo mismo, e en 2023 foi preseleccionado para Una voce per San Marino entre máis de mil aspirantes. Ese mesmo ano lanzou o sinxelo Con Locura, iniciando unha etapa máis independente. En 2025 ampliou o seu repertorio con temas como Carmiña Carmela e Ansiedad.
Influenciado por Lady Gaga, artista que marcou o inicio da súa vocación, Jonydasvie presentará no Atlantic Pride un espectáculo especial que combina cancións propias cos grandes himnos da artista. O show, estruturado como unha viaxe emocional, contará con cinco bailaríns, coreografías coidadas e unha produción escénica ambiciosa.
Con identidade propia e unha proxección ascendente, Jonydasvie busca consolidarse como unha voz destacada do pop urbano actual, ofrecendo un directo intenso, persoal e sorprendente.
SOBRE MONTEDAPENA
Montedapena é o proxecto artístico máis persoal de Héctor Rodríguez. Unha proposta musical capaz de reflectir o sentir de toda unha xeración e coa que o público conecta e se identifica dende a primeira estrofa. Despois do seu primeiro disco publicado a comezos do ano pasado, o artista galego volve este 2026 co seu novo traballo. Os adiantos Me tiré a un facha e Lista de Checks confirman o novo rumbo creativo do proxecto, afondando no terreo do pop-punk: cancións máis directas, físicas, sen complexos, onde a crítica social se mestura coa enerxía festiva e o espírito punk.
SOBRE RAZE
raze é unha artista multidisciplinar queer e viguesa, que consegue un equilibrio harmónico entre a espontaneidade e a esencia máis crúa, neste momento de transición musical. A súa proposta destaca pola profundidade lírica e a riqueza sintética, e pola promesa dun arte de longo consumo: unha obra circular e compacta, representada por unha cebola de cristal. A primeira lectura permite ver o interior, pero só quen se atreve a desollar capa a capa poderá admirar a súa nitidez e complexidade.
A súa investigación artística parte da contraposición de conceptos: natureza e industrialización, electrónico e orgánico, feminidade e masculinidade, escuridade e luz. O uso da linguaxe en raze ten un enfoque naturista e social, explorando novos termos, pronunciacións híbridas e unha ortografía simbólica.
A firma de raze está presente en todas as disciplinas que habita: música, movemento, imaxe. Cunha visión macro do seu universo creativo, constrúe un proxecto 360º cunha forte riqueza dramatúrxica. raze chega cunha proposta sólida e cada vez máis persoal. Unha voz moi especial do novo son do norte.
SOBRE TERRAE DJ’S
Terrae Dj’s nace froito das inquedanzas dun experimentado produtor e un DJ internacional que prefiren manterse no anonimato detrás das súas emblemáticas máscaras. O tándem conta cunha longa traxectoria en estilos de música de baile e na denominada World Music. En Terrae Dj’s conflúen e fúndense todos os seus coñecementos e esforzos para ofrecer unha sesión única con pezas de elaboración propia e de outros artistas da música electrónica con sonoridades de música de raíz de todo o planeta.
SOBRE O ATLANTIC PRIDE, O ‘ORGULLO DO NORTE’ CORUÑÉS
Coñecido como o ‘Orgullo do Norte’, o Atlantic Pride é un festival de música pioneiro, gratuíto e inclusivo que se celebra na cidade da Coruña, destinado a reivindicar a liberdade afectiva, sexual e de identidade dende unha perspectiva lúdica e inclusiva. A cita está impulsada pola Asociación Orgullo Coruña –ORCO– e conta co patrocinio institucional do Concello da Coruña e o apoio da Deputación da Coruña. O Atlantic Pride posúe, tamén, o patrocinio privado de Estrella Galicia, Coruña The Style Outlets e Globalgrafic.
Na súa que na súa 6ª edición, celebrada o pasado mes de xullo de 2025, o Atlantic Pride reuniu a preto de 45.000 persoas. Neste 2026, o ‘Orgullo do Norte’ regresará á cidade herculina para festexar a súa 7ª edición cos primeiros nomes do seu cartel xa anunciados: Miriam Rodríguez, Whigfield, Choriza May, arde, Jonydasvie, Montedapena, raze e Terrae Dj’s.
O Atlantic Pride nace en 2019 coa vontade de situar á cidade herculina como a capital do bo ambiente e a celebración sen distincións nin barreiras. O proxecto, que trata de aglutinar a todas as capas da sociedade dentro dunha contorna segura e amigable, desenvólvese en torno a varios días de concertos e actividades culturais, coa fin de atraer ao público local e de fóra, como un referente cultural, turístico e social e unha das citas imprescindibles do verán no noroeste peninsular.
Tras seis edicións, o Atlantic Pride consolídase como un espazo de celebración aberto, seguro e diverso, como referente dos ‘Orgullos’ que se celebran no comezo do verán ao longo da Península e no que teñen cabida coloridas propostas para todos os públicos, gustos e idades.
Así, no Atlantic Pride non faltan concertos de inspiración eurovisiva, grandes nomes do pop galegos, nacionais e internacionais, divertidas actuacións de drags, pinchadas de dj’s de referencia da escena galega e estatal e a celebración do Certame Literario de Literatura LGTBIQ+, da man do Club de Lectura QUEERuña, que no 2026 afronta a súa quinta edición.
Nos seus xa seis anos de historia, o cartel de Atlantic Pride reuniu figuras como La Terremoto de Alcorcón, La Casa Azul, Ladilla Rusa, Samantha Hudson, Javiera Mena, Grande Amore, Soleá Morente, OBK, Amistades Peligrosas, Fillas de Cassandra, Joe Crepúsculo, La La Love You, Melody, Locomía, Nancys Rubias, Samantha Ballentines, Soraya, Chanel, Lucía Pérez, Las Ketchup, Luna Ki, Mondra, Nena Daconte, Nebulossa, Raúl, Rosa López, Shego, Supremme De Luxe, Vengaboys, Agoraphobia, Anabel Conde, Arantxa Castilla-La Mancha, De Ninghures, David Civera, Edurne, Judeline, Leria, Mayo, Merche ou Nia, entre moitas outras.
