O delegado do Goberno en Galicia, Pedro Blanco, destacará esta tarde en Ferrol o papel protagonista que xoga a mocidade emprendedora da man do Goberno na transformación económica de Galicia. Farao na entrega dos Premios Xove Empresario/a e Iniciativa Emprendedora de Galicia, organizados pola Asociación de Jóvenes Empresarios (AJE) Galicia. Á gala tamén asistirá o subdelegado do Goberno na Coruña, Julio Abalde.
Durante a súa intervención, Pedro Blanco subliñará que os mozos e mozas empresarios xa están a impulsar cambios profundos no tecido produtivo, contribuíndo á dixitalización das pemes, á incorporación de tecnoloxía e á aposta pola sustentabilidade. Unha realidade que, segundo indicará, está a facer que Galicia e España sexan cada vez máis competitivas.
O delegado lembrará que España vive un momento especialmente positivo desde o punto de vista económico, con cifras récord de emprego, crecemento sostido e unha economía cada vez máis forte e aberta ao mundo. Neste contexto, sinalará que a responsabilidade das administracións públicas é acompañar e apoiar aos emprendedores, consolidando un contorno estable e xerando oportunidades.
Ademais, apelará tamén á valentía da mocidade emprendedora nun momento de grandes cambios económicos, tecnolóxicos e políticos. O delegado sinalará que Galicia precisa máis ca nunca persoas mozas que innoven, transformen e impulsen novos proxectos empresariais que permitan facer medrar o tecido produtivo e abrir novas oportunidades de futuro.
Nesta liña trasladará tamén unha mensaxe de apoio do Goberno de España á mocidade emprendedora, sinalando que o Goberno quere seguir sendo un aliado para quen decide emprender, innovar e xerar emprego.
Durante o acto, o delegado felicitará ás empresas premiadas polo seu traballo e pola súa visión empresarial, destacando que representan o exemplo dunha Galicia moderna que mira ao futuro con ambición.
Ferrol recupera o sorriso
Pedro Blanco referirase tamén a Ferrol como unha cidade que está a vivir un novo impulso industrial da man dun Goberno que cre nas súas potencialidades, con novos proxectos e investimentos que están a permitir “devolverlle o sorriso a Ferrol”, converténdoa de novo nun dos referentes industriais de Galicia e de España.
