O delegado do Goberno en Galicia, Pedro Blanco, reivindicou esta mañá en Santiago que garantir a saúde visual da infancia é tamén unha cuestión de igualdade social, subliñando que “ver ben non pode seguir sendo un luxo e moito menos para os nenos e nenas”. Fíxoo durante unha visita á Óptica Camiño, onde puxo en valor o impacto do Plan VEO impulsado polo Ministerio de Sanidade para facilitar o acceso de menores de 16 anos a lentes ou lentes de contacto.
O delegado animou ás familias galegas a beneficiarse desta axuda pública, que permite acceder a ata 100 euros ao ano para a adquisición de lentes ou lentes de contacto e que pode solicitarse de forma sinxela nas propias ópticas adheridas ao programa. A medida está dotada cun orzamento de 48 millóns de euros e poderá solicitarse ata o 31 de decembro de 2026. O seu obxectivo é facilitar o acceso á saúde visual dos menores e evitar que o custo destes produtos supoña unha barreira para as familias.
Pedro Blanco destacou que Galicia é a comunidade autónoma con maior taxa de acceso ao programa en toda España, con 271 solicitantes por cada 10.000 menores de 16 anos, o que supón que máis de 9.500 nenos e nenas galegos xa se beneficiaron destas axudas, preto de 4.000 deles na provincia da Coruña. Para o delegado, estas cifras demostran que o plan “está a funcionar e que chega ás familias que realmente o necesitan”.
O delegado puxo o acento no impacto educativo da medida, lembrando que arredor do 30 % do fracaso escolar en Galicia está relacionado con problemas de visión non corrixidos. “Que un neno ou nena poida ver ben o encerado do seu colexio non pode depender do peto da súa familia”, afirmou, destacando que investir na saúde visual da mocidade é tamén investir en igualdade de oportunidades.
Durante a visita, Pedro Blanco agradeceu á Óptica Camiño e á súa responsable, Alexia Castro, a súa implicación no programa e a súa contribución á difusión da iniciativa. Actualmente, 564 ópticas están adheridas ao Plan VEO en Galicia, das que 246 están na provincia da Coruña e 32 na cidade de Santiago. O delegado salientou tamén o papel dos profesionais do sector, cuxo traballo “sostén unha sanidade pública de calidade”.
