Faltaban dez minutos para as 16 horas cando un particular alertou ao 112 Galicia deste accidente: un coche saíuse da vía na PO-344, ao seu paso polo lugar do Barro (Tomiño), e atropelou un peón que camiñaba pola zona, deixándoo atrapado.
De inmediato, desde o Centro Integrado de Atención ás Emerxencias solicitouse a colaboración de Urxencias Sanitarias de Galicia-061, dos Bombeiros do Porriño, do GES da Guarda, da Garda Civil de Tráfico e da Policía Local e os voluntarios de Protección Civil de Tomiño.
Desde Urxencias Sanitarias de Galicia-061 informaron da saída do helicóptero medicalizado con base en Ourense. Unha vez no lugar, os servizos de emerxencias actuaron para retirar o vehículo e asistir á persoa, mais só puideron confirmar o seu falecemento.
