O Concello de Lugo quere trasladar o seu profundo pesar polo falecemento da concelleira de Cohesión Social, Olga López Racamonde.
Toda a Corporación municipal e o equipo de Goberno lamentan esta perda, que deixa un baleiro moi importante na cidade, e acompañan á súa familia, amizades e compañeiros e compañeiras nun momento de enorme dor.
Olga López Racamonde desenvolveu unha traxectoria marcada polo seu firme compromiso social e pola súa vocación de servizo público. Como matrona e docente de enfermería, e tamén desde a responsabilidade política, dedicou a súa vida a coidar, acompañar e mellorar a vida das persoas, especialmente das máis vulnerables.
Desde o Concello quérese destacar a súa entrega ás políticas sociais, á defensa da sanidade pública e ao benestar das persoas maiores, ámbitos nos que deixou unha pegada fonda na cidade de Lugo.
Mesmo nos momentos máis difíciles, Olga mantivo intacto o seu compromiso co traballo público, ofrecendo un exemplo de responsabilidade, dignidade e xenerosidade ata o final.
A Corporación municipal quere recoñecer e agradecer o seu labor e o seu exemplo, que permanecerán na memoria colectiva de Lugo.
Como mostra de pesar polo seu falecemento, o Concello de Lugo declara loito oficial no termo municipal desde as 9:00 horas de hoxe ata as 9:00 horas do venres 10 de abril. Durante este período, a bandeira do Concello ondeará a media hasta no exterior da Casa Consistorial e no resto das dependencias municipais.
Descansa en paz, Olga.
