O alcalde de Ferrol, José Manuel Rey Varela, acompañado do tenente alcalde, Javier Díaz Mosquera, e da concelleira de Seguridade e Mobilidade, Pamen Pieltain, deu a benvida esta mañá aos 13 novos bombeiros que se incorporan ao parque municipal.
“Cumprimos o noso compromiso de incrementar o plantel para ofrecer un servizo máis eficaz, seguro e preparado para responder ás necesidades da cidadanía”, sinalou o rexedor. Tras a finalización do proceso selectivo, que iniciou este Goberno local en agosto do pasado ano, incorpóranse sete novos profesionais, aos que se suman outros seis procedentes da primeira bolsa de interinos creada polo Concello de Ferrol para este servizo.
Con estas incorporacións, o corpo de bombeiros acada os 50 efectivos, un reforzo clave que ten un dobre impacto positivo, afirmou o rexedor. Por unha banda, permite mellorar a capacidade de resposta ante emerxencias e garantir unha maior seguridade para a veciñanza. E, ademais, contribúe a optimizar as condicións laborais dos propios profesionais, facilitando unha mellor organización das quendas, reducindo a sobrecarga de traballo e incrementando a eficiencia operativa do servizo.
