A Xunta de Goberno local deu luz verde hoxe a 11 convenios no ámbito deportivo por importe total de 415.000 euros, co obxectivo de impulsar a promoción e a difusión do deporte na cidade. “O respaldo deste Goberno ao deporte queda plasmado nestes convenios, no 2026 destinamos 849.000 euros a axudas aos clubes e entidades deportivas”, revelou o rexedor, José Manuel Rey Varela.
Un compromiso do Concello co tecido deportivo local que se reflicte tamén no proxecto da Cidade do Deporte, cun orzamento de 18 millóns de euros repartidos entre a renovación de instalacións como as que xa se están executando en Fimo ou nos campos de fútbol de Caranza; outras que comezarán en breve nos campos de fútbol de A Gándara e na cuberta do estadio de A Malata; e outras novas como as da Cidade náutica.
RENOVACIÓN DE 11 CONVENIOS
En concreto, renovarase a colaboración cos seguintes clubes: Club Universitario Ferrol, Club Triatlón Ferrol, Club Atletismo Ría de Ferrol, Club Basketmi Ferrol, Club Praia Pantín, Escudería automovilística Ferrol, Club de Remo San Felipe A.C.D.R. Grupo Bazán. Nas próximas semanas a XGL seguirá aprobando a renovación de convenios con máis clubs e entidades deportivas.
Con estas iniciativas, “dende o Concello de Ferrol reafirmamos a nosa aposta e compromiso co deporte como ferramenta de promoción da saúde, a cohesión social e, tamén, a proxección da cidade”, afirmou o rexedor, José Manuel Rey Varela.
