A portavoz nacional, Ana Pontón, destacou o traballo do goberno municipal liderado por Goretti Sanmartín que está traballando cada día por mellorar a cidade e impulsando proxectos que transformen Santiago.
«A alcaldesa leva tres anos enderezando o rumbo da cidade, a pesar dos atrancos dunha oposición destrutiva que está traballando en contra de Compostela», recalcou durante a celebración das Festas da Ascensión, nas que participou xunto a Sanmartín, coa que tamén asistiu ao tradicional xantar na feira compostelá.
Pontón explicou que para ela é «sempre un pracer como veciña de Compostela» desfrutar destas festas, ás que se referiu como «as máis picheleiras», e animou a gozar da súa intensa e variada programación e das citas que non poden faltar, como a súa «marabillosa nora» e o resto de atraccións e, como non, de praceres gastronómicos como o polbo.
«Animo a todo o mundo a que veña a estas festas, a que as desfrute e a que as gocemos, porque para min é un día sempre moi especial: nora, polbo e tamén compartir cos compañeiros e compañeiras do BNG», sintetizou.
Un espazo, afondou, para que tanto a veciñanza como as e os visitantes desfruten de todo o que ofrece Santiago, non só co seu patrimonio, senón tamén neste caso coas atraccións, cos cabezudos ou coa música».
A portavoz nacional indicou que estas son unhas festas que desfrutou moito desde hai máis de 30 anos que vive en Compostela e recoñeceu que estes últimos anos lle resultan «máis especiais» ao facelo acompañando á alcaldesa, da que subliñou que «está dando o mellor de si» para mellorar a cidade e impulsar proxectos que a transformar en positivo. «Para ela tamén todo o meu aprecio, a miña admiración e o meu apoio», concluíu.
