A Deputación de Pontevedra mantén aberto ata o xoves 28 de maio o prazo para solicitar os recursos do Vía Depo, o novo plan provincial dotado con 8 millóns de euros para arranxar as estradas de titularidade municipal danadas polos temporais deste inverno. Os recursos deste novo plan extraordinario, dirixido aos 59 concellos de menos de 50.000 habitantes da provincia, súmanse aos 82 millóns de euros investidos polo goberno de Luis López en menos de tres anos na mellora da rede de estradas provinciais.
Este novo plan provincial, en liñas xerais, destinará a cada concello un mínimo de 50.000 € e os recursos restantes repartiranse baixo criterios obxectivos de superficie, poboación e número de entidade singulares. A axuda da Deputación servirá para financiar actuacións relacionadas coa mellora do trazado e o reforzo da estrutura das vías; coa conservación do firme a través do fresado, reparación de pavimentos, fochancas, gretas ou novas capas de rodaxe; coa estabilización de muros de contención que afecten a vías municipais; coa actuación en sistemas de drenaxe, como cunetas ou sumidoiros; ou coa reparación de sendeiros e paseos de acceso a praias fluviais e marítimas.
Estes 8 millóns de euros distribuiranse en 1,8 millóns de euros para as comarcas do Deza, Tabeirós e Terra de Montes, 3,1 millóns de euros para a área de Vigo e sur da provincia, 1,6 millóns de euros para os concellos da contorna de Pontevedra, máis de 350.000 euros para Bueu, Cangas de Morrazo e Moaña, e máis dun millón de euros para os concellos das contorna do Salnés e Arousa. Ademais, estes recursos súmanse aos 82 M€ investidos polo goberno da Deputación en menos de tres anos na conservación e mellora da rede de titularidade provincial. En concreto, en actuacións de conservación integral e accións en firmes e cunetas mobilizáronse 40,5M€ aos que hai que engadir 17,6M€ en mellora de estradas provinciais por iniciativa da Deputación e outros 24,7M€ a través de convenios con concellos.
