O delegado do Goberno en Galicia, Pedro Blanco, destacou hoxe que Galicia renovou no mes de marzo o seu segundo posto entre as comunidades máis seguras de España, que acadara a decembro do ano pasado. Así se desprende do Balance de Criminalidade que vén de publicar esta mañá o Ministerio do Interior e que corresponde ao primeiro trimestre deste ano 2026.
Da análise das cifras deste informe, o delegado significou que Galicia rematou o primeiro trimestre cunha taxa de criminalidade de 35,2 infraccións penais por cada 1.000 habitantes. Esta cifra é dúas décimas inferior á do ano pasado e sitúase máis de 15 puntos por debaixo da media nacional consolidando a Galicia como un territorio seguro “para a cidadanía e para a actividade económica”.
Entre xaneiro e marzo rexistráronse en Galicia 22.812 infraccións penais, un 1,9% menos que no mesmo período de 2025. Baixa a criminalidade convencional, un 1,7%, cun significativo descenso nos furtos dun 11% e dos delitos contra a liberdade sexual, un 10% menos. Pero, máis aínda, descende a cibercriminalidade, que racha coa tendencia alcista dos meses anteriores. Entre xaneiro e marzo coñecéronse un 2,3% menos de ciberdelitos, que, aínda así, representan case un 30% da totalidade de infraccións penais.
A nivel provincial, o delegado subliñou que a taxa de criminalidade baixa por primeira vez en todas as provincias: na Coruña, a taxa queda en 38,2 (descenso dunha décima), en Lugo, a taxa en marzo é de 29 (dúas décimas menos que o ano anterior); en Ourense a taxa baixa medio punto ata 31,2 e Pontevedra queda en 35, anotando unha baixada de dúas décimas.
Felicitación aos Corpos e Forzas de Seguridade
Pedro Blanco felicitou aos homes e mulleres dos Corpos e Forzas de Seguridade do Estado destinados en Galicia por estes resultados, que se unen a unha taxa de eficacia policial elevada, co máis do 44% de delitos resoltos neste trimestre, “unha nova mostra da profesionalidade e do compromiso coa seguridade e benestar desta terra que profesan Policía Nacional e Garda Civil”, concluíu.
Balance de Criminalidade do Primeiro Trimestre
O Ministerio do Interior publica nesta ligazón o informe completo cos datos por provincias, por cidades de máis de 10.000 habitantes e municipios de máis de 20.000 habitantes. Tamén se pode acceder a informes anteriores ata o ano 2016.
