O presidente da Deputación da Coruña, Valentín González Formoso, a deputada de Vías e Obras, Mónica Rodríguez e o alcalde de Carballo, Daniel Pérez, supervisaron hoxe o resultado das obras da terceira e última fase da travesía de Sísamo (DP-1901 Carballo–Sísamo), que se atopan xa rematadas e completan un investimento global de 3,5 millóns de euros, un dos máis importantes acometidos pola Deputación na rede provincial de estradas nos últimos anos.
A actuación desenvolveuse en tres fases. A primeira contou cun investimento de 422.778 euros e a segunda de 861.437 euros, ambas financiadas pola área de Vías e Obras da Deputación da Coruña. A terceira fase supuxo un investimento de 2.236.482 euros, articulado a través dun convenio de colaboración co Concello de Carballo, que cofinanciou con 639.482 euros a dotación de servizos como saneamento e abastecemento de auga ou instalación de mobiliario urbano e xardinería, traballos que se acometeron de forma simultánea coas de mellora e ampliación do vial.
As obras abranguen o tramo comprendido entre o punto quilométrico 0+810 no entronque ao instituto de Monteneme e o lugar de Outeiro (PK 2+570), completando a reurbanización integral da travesía tanto no ámbito urbano como no rural. Os traballos seguiron a mesma liña das fases anteriores, con ancheamento e pavimentación da plataforma, construción de beirarrúas, creación de zonas de aparcadoiro e dotación de servizos urbanos, incluíndo saneamento, abastecemento de auga e alumeado público con luminarias LED.
O próximo paso adminsitrativo, tras a finalización definitiva das obras, será a cesión do vial completo ao Concello de Carballo..
Durante a visita á zona, Formoso destacou que a obra de Sísamo é un dos investimentos “máis importantes por importe e dificultade administrativa” acometidos pola Deputación na rede provincial de estradas nos últimos anos. “Esta obra culmina un investimento moi relevante nun vial clave para Carballo e dá resposta a unha demanda histórica da veciñanza de Sísamo, mellorando de forma notable a seguridade viaria, a mobilidade peonil e a calidade urbana”. O presidente provincial subliñou tamén que “a colaboración do Concello de Carballo e da veciñanza foi fundamental para sacar adiante unha actuación deste alcance”.
Exemplificou a relevancia das obras e da revitalización da zona que supoñen coa “cantidade de vivendas construídas dende que comezamos a apostar por esta vía, en colaboración estreita co Concello”. Remarcou a “dificultade administrativa” que supuxo levala adiante e agradeceu o traballo de todas as persoas implicadas —nomeadamente do vicepresidente provincial, Xosé Regueira— para que esta obra sexa unha realidade.
O alcalde de Carballo, Daniel Pérez, afirmou que “esta obra é un claro exemplo do que debería ser a colaboración entre administracións”. Agradeceu tamén a “implicación da Deputación para que isto sexa hoxe unha realidade” e pechou subliñando que o obxectivo principal da obra é “mellorar a vida da veciñanza de Sísamo actuando nunha vía que vertebra e dota de servizos á parroquia”.
Visita ás obras de reurbanización da rúa Compostela
O presidente a Deputación, a deputada de Vías e Obras e o alcalde supervisaron tamén esta mañá as obras de reurbanización da rúa Compostela (DP 1914) no tramo comprendido entre a rotonda da Milagrosa e o cruce coas rúas Emilio González López e José María Castroviejo, que supoñen un investimento de 204.470 euros.
O obxectivo da actuación é mellorar a accesibilidade e a calidade urbana desta vía, adaptándoa á normativa vixente e creando novos espazos de convivencia para a veciñanza. A zona contará con beirarrúas máis amplas e novas zonas verdes na marxe dereita, que permitirán dispoñer de novos espazos de lecer.
A intervención incluirá tamén a renovación integral das redes de servizos urbanos, como o saneamento e recollida pluviais, o alumeado público e as telecomunicacións.
No apartado de firmes e pavimentos, executarase a renovación completa da calzada e das beirarrúas, con novos acabados de formigón e baldosa de terrazo granallado. O novo firme da calzada contará cun paquete composto por zahorra artificial e capas asfálticas de alta calidade. A actuación completarase coa colocación de nova sinalización horizontal e vertical, así como coa instalación de mobiliario urbano e elementos vexetais, entre os que destacan árbores, novas papeleiras e a substitución dos cubrecontenedores actuais.
Formoso destacou que as obras transformarán a rúa Compostela nun espazo máis accesible, seguro e amable para as persoas, mellorando ao mesmo tempo os servizos e a calidade urbana dunha das principais vías de Carballo.
