As redes sociais forman parte da nosa vida cotiá: informámonos, comunicámonos, construímos identidade e tamén aprendemos —moitas veces sen decatarnos— modelos sobre o que significa ser home, ser muller, relacionarse ou ocupar un lugar no mundo.
Este obradoiro propón un espazo participativo para analizar os novos discursos, estéticas e referentes dixitais arredor da masculinidade e da feminidade, e reflexionar sobre o impacto que teñen na construción das identidades e na reprodución das violencias machistas.
A través dunha metodoloxía dinámica, vivencial e accesible, achegarémonos a tendencias e comunidades presentes nas redes sociais: desde a chamada manosfera e certas masculinidades reactivas —como os discursos incel, os gymbros ou os coaches da sedución— ata novas estéticas femininas como tradwife, that girl ou coquette. A partir destes exemplos, identificaremos mensaxes que poden promover unha volta a modelos tradicionais de xénero, reforzar estereotipos ou normalizar formas sutís de control, presión e desigualdade.
Tamén abordaremos algunhas violencias dixitais que funcionan como ferramentas de vixilancia, disciplinamento ou castigo, especialmente sobre mulleres e persoas que se afastan dos mandatos tradicionais de xénero.
A actividade combina pequenas achegas de contido con dinámicas de reflexión individual e colectiva, xogos e propostas creativas. O obxectivo é xerar un espazo coidado no que recoñecer estes discursos, poñelos en diálogo coa experiencia cotiá e fortalecer unha mirada crítica, igualitaria e libre de violencias.
O obradoiro está dirixido a públicos diversos: profesorado, familias, rapaces e rapazas a partir de 13 anos, asociacións feministas, grupos de mulleres, entidades sociais, persoal técnico municipal e calquera persoa interesada en comprender mellor como operan hoxe os discursos de xénero nas contornas dixitais.
Esta proposta enmárcase na campaña DE FRONTE á violencia de xénero, o programa de actividades impulsado pola Área de Igualdade da Deputación da Coruña para desenvolver accións de sensibilización e prevención das violencias machistas, promovendo a implicación dos concellos e do tecido social e asociativo da provincia.
Características básicas do obradoiro
Duración: 1,5 horas
Participación: mínimo 8 e máximo 30 persoas
Metodoloxía: participativa, vivencial e creativa
Formato: presencial
