O Sindicato de Vivenda da Coruña sinalou publicamente a responsabilidade política do
Goberno local e do Pleno Municipal ante o desafiuzamento de Marta Zurahieva e os seus
catro fillos menores, programado para mañá, xoves 9 de xullo ás 10:00 h. O colectivo
esixe “valentía e determinación” fronte a unha muller vítima de violencia machista e
supervivente que fuxiu da guerra de Ucraína en 2022.
Críticas á alcaldesa Inés Rey.
A organización denuncia firmemente a actitude da alcaldesa, Inés Rey (PSOE), quen era
coñecedora do caso desde abril. Critican que a única saída institucional formulada sexa
unha proposta de “dispositivo de emerxencia”, insuficiente e de carácter temporal,
formulada cando quedan menos de 24 horas para o desfiuzamento. Se non acepta esta
solución, o que ofrece o Estado é o desamparo de Marta e o coidado dos seus cativos baixo
a tutela das administracións, separados entre eles e da súa nai. O goberno local é cómplice
dun sistema que prefire gastar 12.000 € ao mes de cartos públicos en prazas de menores
concertadas coa privada antes que garantir un alugueiro social estable, denuncian desde o
Sindicato.
Chamado á responsabilidade do BNG como oposición
O comunicado interpela de xeito directo á voceira do BNG, Avia Veira, lembrándolle a
capacidade de presión que ten o seu grupo fronte a un goberno local do PSOE ó que sostén
en minoría. O colectivo esíxelles que exerzan ese papel de oposición de xeito contundente
e fagan valer a súa forza política para apremar por unha alternativa habitacional real. Así
mesmo, emprazan a Veira a visibilizar ese compromiso na rúa, acudido mañá, xunto coa
súa base social, a apoiar á familia afectada no domicilio de Marta.
“Marta quédese na Coruña”
Ante a “incapacidade” amosada polas institucións, o Sindicato de Vivenda da Coruña, apela
á veciñanza, ás organizacións estudantís e obreiras e ó resto de colectivos sociais da
cidade, a protexer e apoiar á familia, cuxo desafiuzamento está programado o xoves 9 de
xullo ás 10:00 horas, na rúa Vicente Aleixandre 4
