O delegado do Goberno en Galicia, Pedro Blanco, destacou hoxe o compromiso do Goberno de Pedro Sánchez con proxectos que «transforman Santiago e melloran a vida da cidadanía«. Fíxoo durante a inauguración da Plataforma Loxística de Distribución Urbana de Mercadorías (LóxiCo), unha infraestrutura chamada a revolucionar o reparto da última milla na capital galega. Pedro Blanco sinalou que esta actuación exemplifica un modelo de investimentos que, aínda que ás veces pasan máis desapercibidos, teñen un impacto directo na vida diaria das persoas ao facer as cidades máis sostibles, eficientes e habitables. O delegado participou no acto xunto á alcaldesa de Santiago, Goretti Sanmartín; e o presidente de Mercasa, José Miñones.
Na súa intervención, lembrou que o proxecto contou cun investimento total de 4.598.000 euros, dos que o Goberno de España achega 3.913.920 euros, máis do 85 % do financiamento, a través dos fondos do Plan de Recuperación, Transformación e Resiliencia, xestionado polo Ministerio de Transportes e Mobilidade Sostible. Explicou que a nova plataforma permitirá concentrar a recepción das mercadorías no polígono do Tambre para distribuílas posteriormente mediante vehículos eléctricos de pequeno tamaño, reducindo o tráfico pesado no casco histórico, o ruído e as emisións contaminantes, ao tempo que contribuirá á conservación do patrimonio e fará máis eficiente e flexible o abastecemento dos establecementos comerciais e hostaleiros. Ao respecto, destacou que este proxecto demostra como os fondos europeos «se converteron en servizos e infraestruturas modernas, útiles e transformadoras».
Pedro Blanco enmarcou esta actuación dentro do compromiso do Goberno coa capital de Galicia e asegurou que Santiago «conta co Goberno como o seu mellor aliado». Incidiu en que o Goberno está a impulsar investimentos sen precedentes para responder aos principais retos da cidade, actuando de maneira simultánea en ámbitos como a vivenda, a mobilidade, as infraestruturas, os servizos públicos, o apoio ao tecido empresarial e, agora tamén, a loxística urbana sostible. Neste sentido, afirmou que o Goberno «cumpre con Santiago e cumpre con Galicia» mediante actuacións que modernizan a cidade, melloran o espazo público e incrementan a competitividade económica. Tamén destacou que Santiago se converta na primeira cidade en implantar este modelo de distribución urbana da man de Mercagalicia, unha experiencia pioneira chamada a servir de referencia para outros cascos históricos de España.
O delegado incidiu tamén en que LóxiCo é o resultado da colaboración entre o Ministerio de Transportes e Mobilidade Sostible, o Concello de Santiago, Mercasa, Mercagalicia e o Consorcio de Santiago, coa execución material das obras por parte de TRAGSA. «Cando distintas institucións somos capaces de sumar esforzos e remar na mesma dirección, os resultados falan por si sós», afirmou, ao tempo que agradeceu o traballo desenvolvido por todas as entidades. Para Pedro Blanco, esta colaboración institucional permitiu facer realidade un proxecto transformador que sitúa ás persoas no centro, compatibiliza a actividade económica coa protección do patrimonio e contribúe a construír unha cidade mellor preparada para o futuro. O delegado concluíu asegurando que ese seguirá sendo o compromiso do Goberno de España con Santiago e con Galicia.
