O alcalde de Ferrol, José Manuel Rey Varela, asistiu ao inicio das obras do saneamento do rural; unha actuación que na súa primeira fase estenderase por Doniños, San Xurxo, A Cabana, Valón, Serantes, Pazos, Viladóniga e Vilasanche.
O rexedor acompañou á conselleira de Medio Ambiente e Cambio Climático, Ángeles Vázquez, na posta en marcha dos traballos, nun acto explicativo ao pé da praia de Doniños, no que Rey Varela agradeceu especialmente a presenza de veciños: “Non valía outra cousa que iniciar estas obras para os veciños, porque moitas veces non se entenden os problemas administrativos que te atopas para chegar ao día hoxe, pero se algo creo que destacou neste proceso foi que estivemos acompañados en todo momento polas asociacións de veciños, porque isto é un proxecto de toda a cidade”. O alcalde destacou que “hoxe é o punto de partida e imos tratar que o 2027 sexa o punto de finalización desta primeira fase; moita xente pensaba que non o veriamos nunca”.
A primeira fase das obras de mellora da rede de saneamento e depuración da zona rural ferrolá suporá un investimento de máis de 5,7 millóns de euros, financiado ao 70% pola Xunta de Galicia e o 30%, do Concello. Rey Varela apuntou que “no 2014 tiñamos un proxecto, tiñamos tamén unha financiación. Pasaron oito anos e ese proxecto non se actualizou e o financiamento desapareceu”. É por isto que, segundo o alcalde, “tivemos que retomar no ano 2023 e nos atopamos que a modificación do proxecto, como xa se sabía perfectamente, era intensa, con modificacións normativas, pero tamén con modificacións económicas”. Nese sentido, o alcalde aseverou que “os incrementos de custos agora son o dobre, por iso non valía unha modificación, senón que houbo que facer proxectos diferentes”.
A actuación, pola que se requiriu a expropiación de 79 propiedades, dará servizo directo a unhas 1.400 persoas do ámbito Doniños-Valón e A Cabana, e enmárcase na rede de saneamento que dará cobertura a 4.500 habitantes do rural. “Na miña anterior etapa como alcalde deixamos resolto o saneamento da zona urbana; agora o saneamento da zona rural non é unha promesa, senón unha realidade que se comeza a construír “, recalcou Rey Varela, para concluir: “Nós queremos un Ferrol de primeira, e tamén queremos que a zona rural de Ferrol sexa de pirmeira porque é unha zona de oportunidades”.
Pola súa banda, a conselleira puxo en valor que «prácticamente o 100% da zona urbana de Ferrol está conectada xa aos sistemas de saneamento e depuración, e que agora xa se avanza para que as áreas rurais tamén teñan acceso ao sistema xeral».
