Abel Caballero informou da aprobación na Xunta de Goberno do pasado venres da licitación do programa Vigo Emprende, cun importe de 602.000 euros para os próximos dous anos. O rexedor destacou que o Concello continúa así apoiando a autónomos e empresas tanto na creación de novos proxectos como na consolidación dos seus negocios.
Vigo Emprende ofrece asesoramento e acompañamento a novas iniciativas empresariais e a empresas xa existentes, guiándoas desde a idea inicial ata a súa posta en marcha e colaborando posteriormente na incorporación de melloras durante o desenvolvemento da actividade.
O alcalde salientou os resultados do programa, que desde novembro de 2023 e ata o 31 de xullo deste ano realizou 2.541 servizos de asesoramento. Neste período, Vigo Emprende colaborou con 590 proxectos e negocios da cidade.
O servizo complétase cun programa formativo dirixido ás persoas emprendedoras. Neste tempo desenvolvéronse 58 obradoiros orientados a dar resposta ás súas necesidades de formación e facilitar ferramentas para a creación, desenvolvemento e consolidación dos seus proxectos empresariais.
