A Xunta de Goberno Local vén de aprobar a proposta de adxudicación das obras incluídas no aglomerado da avenida de Castelao á empresa Canarga SL na cantidade total de 266.679,99 euros. A actuación permitirá renovar máis de 10.000 metros cadrados de pavimento nunha das principais vías de comunicación do barrio e supón un novo paso no compromiso do Goberno municipal coa recuperación e o mantemento da rede viaria da cidade.
Dende o Goberno local seguimos traballando de maneira progresiva en actuacións de aglomerado e conservación en diferentes puntos da cidade para dar resposta ao deterioro acumulado tras anos de falta de mantemento das vías públicas e mellorar as condicións de seguridade e circulación, subliñou o rexedor, José Manuel Rey Varela. Durante os tres primeiros anos de desenvolvemento do plan realizáronse 55 intervencións, aglomerando 21,5 quilómetros de estradas cun investimento de máis de 2,6 millóns de euros.
A intervención na avenida de Castelao inclúese dentro deste plan, é unha das actuacións de maior dimensión previstas neste ámbito e responde, ademais, a unha demanda histórica dos veciños e usuarios de Caranza.
A obra contará cun prazo de execución de tres meses, a partir do día seguinte á sinatura da acta de comprobación do replanteo, e cun prazo total de garantía de cinco anos, o que supón un incremento de catro anos sobre o mínimo establecido nos pregos.
“A avenida de Castelao é un dos principais eixes de comunicación de Caranza, un dos barrios máis poboados de Ferrol, polo que esta intervención terá un impacto directo na mobilidade diaria dos veciños e veciñas”, asegurou.
Por esta vía circulan diariamente vehículos particulares, transporte público e servizos, polo que a súa mellora resulta prioritaria para incrementar a seguridade viaria e ofrecer unhas condicións de circulación máis cómodas e eficientes.
Na actualidade o pavimento presenta un evidente estado de deterioro na súa capa de rodadura, con zonas de fochancas e deformacións que dificultan a circulación e ocasionan molestias tanto a condutores como a peóns. Esta situación incrementa o risco de accidentes, danos nos vehículos e caídas, polo que a súa reparación era unha das actuacións máis demandadas pola veciñanza e polos usuarios habituais da vía.
A nosa prioridade é seguir actuando nos barrios, mellorar os espazos públicos e ofrecer á cidadanía unhas vías máis seguras e unhas mellores condicións de mobilidade”, sinalou Rey Varela.
TRABALLOS PREVISTOS
O proxecto contempla o fresado en todo o perímetro da obra o firme en todo o perímetro da actuación cun espesor de ata seis centímetros nas zonas de encontro coas rúas adxacentes, beirarrúas e contornos de tapas e arquetas. No resto da superficie realizarase o fresado necesario para garantir un espesor mínimo de seis centímetros da nova capa de rodadura.
Ademais, executarase o saneamento da capa intermedia nas zonas máis deterioradas, previo fresado e reparación das mesmas, e instalarase a sinalización horizontal provisional necesaria durante o desenvolvemento das obras.
MÁIS ACTUACIÓNS EN CARANZA
A este aglomerado súmanse distintas actuacións de mellora que se están levando a cabo no barrio de Caranza como as obras de conservación e mantemento da envolvente do centro cívico (499.475,90 euros); as obras de accesibilidade no ámbito das rúas Sao Paulo, Padre Feijóo e Armada Española (88.759,76 euros), a renovación da sinalización horizontal, tarefas de limpeza e desbroces.
No ámbito deportivo, finalizaron as obras de remodelación das dúas pistas de fútbol 8 do parque deportivo de Caranza, que se converteron nun único campo de fútbol 11 (809.555,95 euros).
Ademais, está previsto que en breve poidan comezar as obras de mellora da Casa do Deporte, xa adxudicadas por 188.142,90 euros, e do complexo polideportivo Javier Gómez Noya, cun investimento de 454.780,87 euros.
O Goberno local continúa avanzando na planificación das diferentes actuacións previstas nos barrios que combina a recuperación da rede viaria, a mellora da accesibilidade, a conservación dos equipamentos públicos e a renovación das instalacións deportivas, dando resposta ás necesidades trasladadas pola veciñanza.
