A Xunta de Goberno local aprobou esta mañá a licitación das obras de reurbanización do final da avenida Doutor Fleming e comunicación peonil entre as rúa Alonso López e Ignacio Martell, no barrio de Canido. O importe de licitación é de 319.331,45 euros e o prazo de execución de seis meses.
“Trátase dunha actuación moi demanda dende hai anos polos veciños”, destacou o rexedor, José Manuel Rey Varela, e que “agora acometeremos tras escoitar as súas necesidades e propostas para rematar o tramo final de Doutor Fleming, e crear unha comunicación directa entre a rúa Alonso López e a praza que inicia a rúa Ignacio Martell”.
As obras corresponden á reurbanización do actual espazo viario que o PXOM define entre as tres rúas: Alonso López, Doutor Fleming e Ignacio Martell. “Esta intervención garantirán os tránsito peonil entre elas e a apertura dun novo espazo aberto e continuo de permeabilidade”, asegurou o rexedor.
NOVAS ZONAS VERDES
O proxecto manifesta unha aposta clara pola accesibilidade, así, xerarase un espazo con prioridade de uso peonil no que só se permitirá o paso de vehículos para acceder ao garaxe dunha vivenda unifamiliar no fondo da avenida Doutor Fleming, e aos futuros garaxes que sirvan a dúas parcelas máis de solo urbano consolidado que dan ao ámbito de urbanización. Este espazo permitirá a permeabilidade accesible entre esta rúa e a rúa Alonso López.
Haberá novos espazos verdes, plantarase un arboredo bilateral en Doutor Fleming e xeraranse dous espazos verdes con árbores e bancos para disfrute da veciñanza e dos nenos, dada a proximidade dun centro educativo.
Entre as especies elixidas, están árbores da especie cerezo de flor de 16 a 20 centímetros de diámetro de tronco. É unha árbore de porte medio, que pode alcanzar entre seis e os nove metros de altura e catro a sete metros de diámetro. A zona axardinada completarase cun manto floreado de hortensia.
PAVIMENTO E MOBILIARIO
En canto ao pavimento, utilizaranse principalmente dous firmes. Un na zona peonil, consistente en base de formigón en masa de 15 centímetros de espesor, e outro na zona de tráfico rodado, cun firme ríxido para tráfico pesado composto de capa de 20 centímetros de espesor.
Ademais, habilitarase unhas escaleiras que permitan salvar os aproximadamente dous metros de diferencia de cota entre as rúas Alonso López e Ignacio Martell que permitan a comunicación peonil entre elas.
A intervención complétase cunha serie de bancos para os dous espazos axardinados, novas luminarias con tecnoloxía led, unha fonte de auga e dúas canastras de baloncesto nun espazo libre para xerar un lugar de xogo.
“Esperamos que os veciños poidan disfrutar pronto deste novo espazo”, desexou o rexedor, ao tempo que destacou a aposta do Goberno local “por executar obras de reurbanización integral nas rúas que se atopan en peor estado da cidade, como a Rubalcava, co obxectivo de garantir a seguridade vial para peóns e condutores”.
