O delegado do Goberno en Galicia, Pedro Blanco, remarcou hoxe na Coruña que o Goberno está preparado “para que Galicia viva o momento histórico da Eclipse sen sobresaltos, con todas as garantías para a poboación e o territorio”. Pedro Blanco presidiu na Coruña unha reunión de coordinación na que participaron responsables de todos os organismos da Administración Xeral do Estado que están vinculados aos retos que implica o operativo ao redor dun fenómeno astronómico que non se ve na Península Ibérica desde hai máis de 120 anos.
Pedro Blanco detallou os principais desafíos que ten o Goberno de cara a esta Eclipse, que é a primeira das tres que se verán desde España nos próximos anos e que foron bautizados como ‘Trío de Eclipses 2026-2027-2028’. Así, o delegado citou cinco ámbitos prioritarios: a mobilidade e o tráfico, a seguridade e a protección civil e do medio natural, a saúde pública, a sensibilización e información, e a coordinación.
“O Goberno prevé o desprazamento de 10 millóns de persoas cara os lugares de España nos que se verá a eclipse de maneira completa e unha gran parte dese movemento terá como destino Galicia”, lembrou o delegado. O 12 de agosto, Galicia será un lugar único en España para ver a eclipse posto que se producirá no entre lusco e fusco, antes da posta da sol: “isto converte a Galicia nun punto de visualización prioritario para as persoas amantes destes fenómenos, sobre todo o litoral central e norte da provincia da Coruña e A Mariña de Lugo”, engadiu Pedro Blanco.
Asistentes
A reunión congregou a representantes en Galicia dos departamentos vinculados ao operativo: AEMET, CSIC, IGN, Tráfico, Garda Civil e Sector de Tráfico, Policía Nacional, Protección Civil, Telecomunicacións, Renfe e Adif, Marina Mercante e Demarcación de Estradas.
Trío de Eclipses
O coñecido como Trío de Eclipses é un fenómeno astronómico extraordinario que se poderá ver desde España e captará a atención da comunidade científica, así como do conxunto da cidadanía e provocará a chegada de turistas de todo o mundo. Implicará previsiblemente desprazamentos masivos e afluencia de centenares de miles de persoas aos puntos onde as eclipses poderanse ver como totais, o que supón desafíos loxísticos e de seguridade para as administracións públicas.
Para preparar estes operativos, o Goberno constituíu o pasado ano a Comisión Interministerial para a preparación, organización e coordinación de actuacións relacionadas co chamado Trío de Eclipses 2026-2027-2028 na que participan 13 departamentos ministeriais e que xa celebrou varias reunións (a última a principios deste mes de febreiro). Derivada desta Comisión existen xa cinco grupos de traballo específicos que están traballando e nos que a Delegación do Goberno en Galicia participa a través de representantes.
Eclipse do 12 de agosto
A primeira do Trío de Eclipses será unha eclipse total de sol que se producirá na tarde do 12 de agosto. Os organismos expertos sinalan a súa excepcionalidade pois España será o único territorio habitado onde se poderá observar.
En Galicia, segundo os datos do Instituto Xeográfico Nacional (IGN), un 56,3% do territorio galego poderá ver a eclipse total, unha porcentaxe que supera o 98% na provincia de Lugo. A provincia que terá menos porcentaxe de visualización completa será Pontevedra cun 9,5% do territorio dentro da franxa de totalidade.
O primeiro lugar de Galicia onde se verá a eclipse total será o Cabo de Estaca de Bares, no municipio coruñés de Mañón. Pola contra, o último lugar de Galicia onde se verá a eclipse total será no municipio da Veiga, na fronteira co municipio de Porto en Zamora.
En canto á duración, a fase de eclipse total oscilará entre os 9 segundos e o minuto e 49 segundos na zona da Mariña de Lugo.
Na web https://eclipses.ign.es/ pódese acceder a un visualizador que nos indica os principais parámetros deste fenómeno en cada punto do territorio así como información científica, recursos e materiais divulgativos así como consellos para unha correcta visualización.
