O subdelegado do Goberno na Coruña, Julio Abalde, copresidiu esta mañá xunto co alcalde de Arzúa, Xoán Xesús Carril, a Xunta Local de Seguridade, na que se analizaron os datos de criminalidade do municipio e se coordinou o dispositivo especial con motivo da celebración da 51.ª edición da Festa do Queixo, que terá lugar esta fin de semana.
Durante a reunión, púxose de manifesto que Arzúa presenta unha taxa de criminalidade de 22,48 delitos por cada mil habitantes no ano 2025, unha cifra inferior á do exercicio anterior, menos da metade da taxa media de España e sensiblemente por debaixo da de Galicia, que é a segunda comunidade autónoma máis segura do país. Neste contexto, o subdelegado salientou que “acadamos a mellor eficacia policial da década e un máximo histórico de efectivos, con 8.895 axentes da Policía Nacional e da Garda Civil en Galicia, 596 máis que en 2018”.
Julio Abalde destacou tamén a boa colaboración existente entre a Policía Local e a Garda Civil no municipio, insistindo na importancia de manter esta coordinación para continuar mellorando os datos de seguridade.
No apartado dedicado á loita contra a violencia de xénero, informouse de que Arzúa recibiu no ano 2025 un total de 8.722,63 euros procedentes dos Fondos do Pacto de Estado contra a Violencia de Xénero. Desde o ano 2018, o municipio leva percibidos máis de 34.900 euros por este concepto. Na provincia da Coruña hai actualmente 2.711 casos activos.
A Xunta Local incluíu tamén un balance das actuacións nesta materia. Neste punto, o subdelegado fixo un chamamento á adhesión do Concello ao Sistema de Seguimento Integral nos casos de Violencia de Xénero (Sistema VioGén), dependente do Ministerio do Interior, como instrumento clave para reforzar a protección das vítimas. “A adhesión ao sistema VioGén é unha ferramenta fundamental para reforzar a protección das vítimas e mellorar a coordinación institucional”, subliñou.
No ámbito preventivo, abordouse o desenvolvemento do Plan Director para a Convivencia e a Mellora da Seguridade nos Centros Educativos e os seus Contornos, impulsado polo Ministerio do Interior. En Arzúa, este programa está implantado pola Garda Civil e contou coa participación de 834 persoas a través de 30 actividades centradas en cuestións como a violencia de xénero e a prevención de delitos sexuais, o acoso escolar e o ciberacoso, a ciberseguridade, a protección de datos persoais ou o consumo de drogas e alcohol.
Finalmente, analizouse o dispositivo especial de seguridade para a Festa do Queixo, que se celebra en Arzúa desde hai máis de 50 anos e que congrega cada edición a milleiros de visitantes. Policía Local e Garda Civil colaborarán estreitamente para garantir o bo desenvolvemento dos actos previstos.
O pregón desta edición correrá a cargo do actor Federico Pérez Rey, que o sábado 28 de febreiro, tras os actos de inauguración, a partir das 12:00 horas na carpa do campo da feira, dará comezo oficial á festa. Nado en Alemaña en 1976 e vencellado a Mazaricos, cursou estudos de Filoloxía Galega na Universidade de Santiago de Compostela e desenvolveu unha ampla traxectoria como actor en teatro, cine e televisión, ademais de traballar como asesor lingüístico e guionista.
