A Deputación da Coruña desenvolveu este mércores no CEIP Plurilingüe Celso Emilio Ferreiro de Cerceda a actividade educativa “Coidamos o mar sen plásticos”, unha iniciativa dirixida a concienciar ao alumnado sobre a importancia de reducir os residuos plásticos e contribuír á protección dos ecosistemas mariños.
A xornada tivo como obxectivo transmitir aos nenos e nenas que pequenos xestos do día a día, como reutilizar, reciclar ou reducir o uso de plásticos, poden ter un impacto moi positivo na conservación do mar e do medio ambiente.
A deputada de Mar e Medio Rural da Deputación da Coruña, Cristina Capelán, acompañou ao alumnado durante a actividade e participou activamente nas dinámicas educativas, destacando a importancia de fomentar desde idades temperás valores de respecto e coidado do medio natural.
“O mar forma parte da nosa vida e é responsabilidade de todos e todas protexelo. Pequenos xestos do día a día, como reducir, reutilizar e reciclar, poden contribuír a ter un mar máis limpo e un planeta mellor”, sinalou a deputada.
A institución provincial ten previsto estender nas próximas semanas a actividade “Coidamos o mar sen plásticos” a distintos centros educativos da provincia, co obxectivo de seguir promovendo entre o alumnado a importancia de coidar o medio ambiente e preservar os ecosistemas mariños.
