A Xunta de Goberno Local aprobou o proxecto Abrir Ferrol ao Mar-Caranza, unha actuación clave para a rexeneración da fronte marítima e a mellora da calidade urbana, que conta cun investimento de preto 1,2 millóns de euros.
O alcalde de Ferrol, José Manuel Rey Varela, avanzou que “hoxe anunciamos tres investimentos máis para Caranza que suman 1,5 millóns de euros: Abrir Ferrol ao Mar, as melloras na Casa do Deporte e as obras de accesibilidade nas rúas Sao Paulo, Padre Feijóo e Armada Española”. Estes investimentos no barrio máis populoso da cidade únense aos que xa están en execución neste momento, onde destacan a renovación da cuberta do Centro Cívico e os campos de fútbol do Galicia de Caranza, por 1,2 millóns de euros. “Un compromiso real con Caranza”, afirmou.
ABRIR FERROL AO MAR
Rey Varela destacou o esforzo inversor do proxecto Abrir Ferrol ao mar. A fase de Ferrol Vello, A Magdalena e Arsenal foi adxudicada por 5,3 millóns de euros e neste momento lévanse derrubados máis de 300 metros de muralla. A fase de Esteiro, cuxas obras comezarán en breve, foi adxudicada hai unhas semanas por 2,7 millóns de euros.
Rey Varela subliñou a relevancia desta intervención en Caranza, “para seguir avanzando nun modelo de cidade máis sostible, accesible e conectada coa súa contorna natural”. Afirmou, ademais, que este proxecto “supón un paso decisivo para consolidar unha fronte marítima moderna, accesible e sostible, ao tempo que permite recuperar 32.000 metros cadrados de espazo público para a cidadanía”. Así mesmo, subliñou a importancia da colaboración institucional para facer posible unha actuación desta envergadura.
As obras enmárcanse no convenio de colaboración entre o Concello de Ferrol e a Axencia Galega de Infraestruturas, denominado “Segunda fase das actuacións de fomento da mobilidade sostible na fachada marítima e portuaria da cidade de Ferrol”. As actuacións están cofinanciadas nun 50 % pola Axencia Galega de Infraestruturas, reforzando así o compromiso conxunto de ambas administracións coa modernización e mellora do litoral urbano.
O proxecto desenvólvese na contorna da enseada de Caranza, onde conflúen a rúa Telleiras e a avenida do Mar. A intervención abrangue unha superficie aproximada de 32.000 metros cadrados e unha lonxitude próxima aos 600 metros, o que permitirá crear un gran espazo público de calidade, pensado para o uso cidadán, o encontro e a convivencia.
Grazas a esta intervención, “créase un gran espazo continuo ao longo da fachada marítima, favorecendo a integración entre a cidade e o mar e recuperando para a cidadanía unha parte fundamental do litoral”, destacou o alcalde.
UNHA GRAN ZONA DE ESPAREXEMENTO
O proxecto contempla unha reorganización integral do ámbito, mellorando a mobilidade peonil e ciclista, reforzando os accesos desde o tecido urbano e potenciando os espazos de estancia, lecer e convivencia. Así, reordénanse os percorridos existentes no bordo costeiro e acondiciónanse os accesos transversais cara a Caranza e os equipamentos próximos, facilitando desprazamentos seguros, cómodos e accesibles.
Rey Varela, recordou que neste tramo discorre o Camiño Inglés, que “será rehabilitado para mellorar a súa accesibilidade e a súa integración paisaxística”. Así, o itinerario será ampliado e repavimentado mediante xabre estabilizado, garantindo durabilidade, seguridade e comodidade para peregrinos, veciños e visitantes.
Entre este tramo do Camiño Inglés e a Avenida do Mar configurarase un gran espazo multifuncional destinado ao uso cidadán. Este ámbito contará con zonas de xogos infantís con pavimento continuo de caucho reciclado, áreas recreativas e deportivas, espazos de descanso, unha zona multiusos con función de miradoiro e auditorio ao aire libre, así como novos accesos lonxitudinais e transversais. “Todo iso permitirá consolidar esta contorna como un punto de encontro e actividade ao aire libre e en contacto coa ría”, asegurou Rey Varela.
A actuación incorpora unha importante mellora paisaxística e ambiental mediante a plantación de novas árbores, a creación de zonas verdes e a implantación de sistemas de rego por goteo. As árbores disporán de sistemas antiraíces e protección específica para garantir o seu desenvolvemento e conservación, contribuíndo a restaurar ambientalmente este espazo.
MÁIS PRAZAS DE APARCAMENTO
Un dos eixos principais desta fase é a mellora da oferta de aparcamento. Crearanse dous novos estacionamentos: un na rúa Fonte da Greza, con 24 prazas, e outro na contorna da rúa Telleiras coa rúa 5, con 50 prazas, das cales tres estarán reservadas para persoas con mobilidade reducida.
En total, habilitaranse 74 novas prazas. “É posible compatibilizar e complementar as zonas verdes con novos espazos para estacionar, facilitando o acceso da cidadanía e visitantes a esta zona de esparexemento”, insistiu o rexedor.
Ademais, renovarase o aparcamento existente na parte traseira do auditorio, que conta con 52 prazas, mediante a mellora do pavimento, o pintado das prazas e a actualización da sinalización, incrementando a súa funcionalidade, seguridade e accesibilidade.
O proxecto inclúe, tamén, unha nova instalación de iluminación nas zonas de aparcamento e no parque infantil, garantindo unha adecuada iluminación nocturna. Noutras áreas manterase unha iluminación limitada para preservar o carácter natural do litoral. Así mesmo, instalaranse canalizacións para futuros servizos Smart City, facilitando a implantación de novas tecnoloxías.
MATERIAIS SOSTIBLES
En materia de pavimentación e acabados, o proxecto aposta por materiais sostibles, resistentes e de alta calidade. Así, as zonas peonís executaranse con laxas fotocatalíticas descontaminantes, capaces de contribuír á redución de contaminantes do aire.
Os accesos rodados e áreas de estacionamento pavimentaranse con lastra de granito, mentres que os bordos, bancadas e elementos de contención resolveranse en cantería granítica. A rede de camiños naturais recuperará o pavimento de xabre, delimitado con pedra, reforzando a súa integración na contorna.
- Únete á nosa canle de Whatsapp para recibir notificacións de interese
O mobiliario urbano deseñarase baixo criterios de funcionalidade, sinxeleza e baixo mantemento, coa instalación de bancos de pedra e madeira, papeleiras, aparcabicicletas e elementos de descanso integrados na paisaxe urbana.
DÚAS FASES
Rey Varela adiantou que se farán dúas fases xa que “queremos comezar xa esta actuación e estamos ultimando con Costas do Estado a area desta nova praia e a rexeneración da actual”.
A actuación correspondente á zona da praia levarase a cabo mediante un proxecto independente, denominado Fase 3B, mentres que a fase que agora se aproba céntrase principalmente na rexeneración urbana, na mellora dos espazos públicos e na mobilidade.
O orzamento desta fase ascende a 1.160.706,09 euros e o prazo de execución previsto é de 13 meses.
Para finalizar, o alcalde subliñou que este proxecto amosa que “continuamos avanzando na recuperación da fachada marítima, apostando por unha cidade máis verde, máis azul e máis conectada co noso plan de mobilidade”.
