A Xunta de Goberno local aprobou o convenio de cooperación coa Deputación da Coruña para actuacións contempladas no Plan de Sostenibilidade Turística en Destino (PSTD) centro histórico de Ferrol e patrimonio militar da Costa Ártabra, financiado con Fondos do Plan de Recuperación,Transformación e Resiliencia–financiado pola Unión Europea-Next Generation.
Este convenio recolle dentro do eixe Transición verde e sostible, o proxecto de creación de aparcamentos disuasorios no centro histórico de Ferrol e nas vías de acceso ao patrimonio militar. O investimento é de 217.726,37 euros, dos que 72.696,79 euros son aportados polo Concello de Ferrol para tres actuacións.
E no eixo Mellora da eficiencia enerxética: a creación e sinalización de camiños ciclables nas baterías militares de Ferrolterra cun investimento de 120.000 euros, dos que o Concello aporta 33.345,20 euros. E a mellora da iluminación eficiente no centro histórico de Ferrol e nos accesos, contorno e infraestruturas do patrimonio militar, unha actuación orzamentada en 100.000 euros, na que o Concello participa con 50.000 euros.
“Estamos ante un completo deseño de actuacións para potenciar o turismo en Ferrol para que siga sendo un motor económico na nosa comarca”, afirmou o alcalde, José Manuel Rey Varela.
NOVO APARCAMENTO
Hoxe deuse un paso máis nesta liña coa aprobación do proxecto de creación dun aparcamento na rúa Julio Pardo de Atín, con acceso desde a rúa Concepción Arenal. “Estamos traballando xa coa previsión do futuro Museo de Ferrol, que se ubicará no Torrente, facilitando un espazo para estacionar”, confirmou Rey Varela.
Na actualidade, este espazo xa se usa de forma informal como estacionamento, pero sen unha delimitación clara de prazas nin unha solución adecuada desde o punto de vista da drenaxe, a accesibilidade ou a integración paisaxística. “Acondicionarase este espazo como un aparcamento disuasorio que contará cunhas oito prazas, unha das cales reservarase para persoas con mobilidade reducida”, avanzou o rexedor.
Grazas a este aparcamento ordenarase un espazo urbano infrautilizado, reducirase o estacionamento irregular e incrementarase a calidade urbana e paisaxística nesta zona.
O proxecto contempla tamén a instalación de sinalización horizontal coa delimitación das prazas de aparcamento, e a vertical informando do carácter disuasorio do aparcamento. Así mesmo, instalaranse catro luminarias para a reforzar a iluminación deste espazo e mellorar a súa percepción nocturna.
O orzamento é de 62.400 euros e o prazo de execución é dun mes.
