O concelleiro de Deportes, Ricardo Aldrey, avanzou que as obras de remodelación das dúas pistas de fútbol 8 do parque deportivo de Caranza- que se converterán nun único campo de fútbol 11- están centradas nestes días nos traballos de movemento de terras necesarios para a futura instalación das gradas.
O proxecto implica a intervención en 8.900 metros cadrados de terreo dentro do parque e conta cun orzamento de máis de 809.000 euros. O proxecto contempla a remodelación das dúas pistas actuais de fútbol 8 para ser convertidas nun único campo de fútbol 11 (divisible á súa vez, en disposición transversal, en dúas pistas de fútbol 8) de céspede artificial homologado. Ademais, incluirá todo o equipamento preciso: porterías, banderíns, banquiños cubertos, redes de protección e demais elementos deportivos.
Así mesmo, instalarase unha bancada descuberta de formigón prefabricado de 45 metros de lonxitude e sete niveis, situada sobre o noiro resultante da ampliación do campo. Estas obras mellorarán de forma significativa a funcionalidade e calidade das instalacións, adaptándoas ás necesidades actuais dos clubs e deportistas da cidade,
Outras das intervencións que se levará a cabo é a instalación de novo rego centralizado e recollida de pluviais e drenaxe do campo con recuperación de auga para a rega, así como un novo sistema de alumeado mediante led sobre mástiles. Tamén está contemplada a plantación de céspede natural nas zonas que quedan libres de ocupación dada a nova formalización da pista de fútbol 11.
Con respecto ás obras nos campos de fútbol de A Gándara, as obras de mellora xa foron adxudicadas por máis de 306.000 euros e espérase que poidan comezar nas próximas semanas.
Estas dúas intervencións enmárcanse no proxecto estratéxico Cidade do Deporte, cofinanciado pola Xunta de Galicia, a través da consellería de Deportes.
