O delegado do Goberno en Galicia, Pedro Blanco, destacou hoxe que o proceso de regularización extraordinaria de persoas estranxeiras que xa viven en España se está a desenvolver sen incidencias e con plena normalidade nas 15 oficinas habilitadas en Galicia. Fíxoo durante unha visita á oficina de Correos situada na rúa Alcalde Manuel Casas da Coruña, acompañado polo subdelegado do Goberno na provincia, Julio Abalde, e polo xefe de sector de Correos, José Manuel Costa, onde supervisaron o desenvolvemento do procedemento regulatorio.
A atención presencial préstase en Galicia en oficinas da Seguridade Social e de Correos distribuídas polas catro provincias, con reforzo de persoal nas zonas con maior presenza de persoas estranxeiras. O delegado lembrou que este servizo só se ofrece con cita previa para ordenar os fluxos de persoas e evitar aglomeracións. Ademais, indicou que se habilitaron horarios específicos para que o proceso non interfira co funcionamento habitual das oficinas, garantindo a normalidade no resto de trámites.
Pedro Blanco agradeceu o traballo dos funcionarios e funcionarias implicados, así como a colaboración dos concellos na elaboración dos informes necesarios en determinados casos e destacou tamén o comportamento exemplar das persoas solicitantes.
O delegado subliñou que se trata dun proceso “moi garantista, moi preparado, que nos vai permitir seguir crecendo e progresando”. A regularización, insistiu, estase desenvolvendo con normalidade nestes primeiros días e conta co respaldo da cidadanía, do tecido empresarial e dos sindicatos.
Así mesmo, sinalou que esta medida é “moi importante para miles de persoas e familias en Galicia” e defendeuna como “un paso decisivo, xusto e necesario”, que permite recoñecer a realidade de persoas que xa viven, traballan e contribúen ao progreso colectivo, garantindo os mesmos dereitos e obrigas.
Finalmente, reivindicou Galicia como unha terra aberta e solidaria, “que sabe o que é emigrar e que sempre soubo acoller”, subliñando que o país avanza cando suma e non deixa a ninguén atrás.
