A deputada de Emprego, Industria, Medio Ambiente, e Política Demográfica da Deputación da Coruña, Rosa Ana García, visitou Espazo Nature, en Razo (Carballo), unha iniciativa de turismo sostible distinguida nos Premios PEL 2025 como exemplo de emprendemento innovador no rural.
Durante a visita, a deputada puxo en valor o papel deste tipo de proxectos no desenvolvemento económico da provincia, especialmente no rural: “Iniciativas como Espazo Nature demostran que hai futuro no rural cando se aposta pola innovación, pola sustentabilidade e por modelos de negocio ligados ao territorio”. García subliñou que “o PEL nace precisamente para apoiar este tipo de empresas, que xeran emprego de calidade e contribúen a dinamizar a economía local”.
O proxecto, situado entre a praia de Razo e a lagoa de Baldaio, aposta por unha proposta turística baseada no respecto polo medio ambiente e no benestar das persoas. O complexo combina aloxamento integrado na contorna natural con prácticas sostibles, como o uso de enerxías renovables, a eficiencia enerxética ou a elección de materiais respectuosos co entorno.
Ademais do seu valor ambiental, Espazo Nature contribúe á creación de emprego e á fixación de poboación no territorio, converténdose nun exemplo de como o emprendemento pode ser tamén unha ferramenta para revitalizar o medio rural.
80.000 euros en premios no PEL 2026
A deputada aproveitou a visita para lembrar que está aberta a nova edición dos Premios PEL 2026, cuxo prazo de presentación de candidaturas remata o 12 de maio. A convocatoria está dotada con 80.000 euros en premios destinados a recoñecer iniciativas empresariais destacadas en ámbitos como a innovación, a sustentabilidade, a creación de emprego ou a traxectoria empresarial.
“Este ano incrementamos a dotación económica dos premios porque queremos que máis empresas dean o paso e se presenten. Na provincia hai moito talento e moitos proxectos que merecen visibilidade e apoio”, sinalou Rosa Ana García, que animou especialmente ás iniciativas do rural a participar.
