O alcalde de Ferrol, José Manuel Rey Varela, informou da adxudicación das obras do proxecto da Cidade Náutica de A Cabana. A XGL aprobou adxudicar á empresa Misturas Obras e Proxectos S.A esta actuación por un importe de 1.698.669,39 euros. As obras teñen un prazo de execución de 14 meses e contan cun prazo de garantía total de seis anos, o que supón un incremento do prazo de garantía de cinco anos respecto do prazo mínimo de garantía dun ano que figura nos pregos.
“O proxecto da Cidade do Deporte continúa avanzando con paso firme, sumando novos fitos e consolidándose cun investimento histórico de 18 millóns de euros destinado á creación de modernas instalacións deportivas e á mellora das xa existentes”, afirmou Rey Varela.
Neste momento, o concello ten xa mobilizados máis de 13,4 millóns de euros destinados ao deporte ferrolán, a través da execución e próxima licitación de novas infraestruturas e da mellora das instalacións actuais. Así, ás obras en FIMO (5,7 millóns) e nos campos de fútbol de Caranza (809.000 euros), sumaranse proximamente as da cuberta do estadio da Malata (4 millóns) e nos campos de fútbol da Gándara (306.000 euros).
Ademais, sairán a licitación nas próximas semanas actuacións na Casa do Deporte (190.000 euros), no complexo deportivo Javier Gómez Noya (525.000 euros) e no pavillón do Ensanche A (360.000 euros), reforzando un compromiso firme e sostido co deporte na cidade.
UNHA CIDADE NÁUTICA ÚNICA
Rey Varela destacou o potencial deste proxecto, “non só contaremos cunhas renovadas instalacións á altura dos nosos deportistas, senón que temos o privilexio de contar cun entorno único como é a ría de Ferrol”. Por fin, apuntou, “compensaremos a débeda cos clubs de remo de San Felipe e A Cabana, a Sección de vela do Grupo Bazán e o Club de Actividades Subacuáticas Ferrol”.
As actuacións previstas van encamiñadas a mellorar o uso e funcionalidade deste espazo natural en contacto co mar e céntranse na restauración e rehabilitación das edificacións existentes.
Con este proxecto -insistiu Rey Varela- poremos en valor o patrimonio histórico industrial desta área e, ao mesmo tempo, converterase nun espazo de paseo para toda a poboación, comunicado mediante o paseo marítimo co resto dos equipamentos deportivos do eixo A Cabana, Fimo e A Malata.
A parcela de 13.000 metros cadrados alberga seis edificacións nas que se actuará. No edificio 1, de preto de 900 metros cadrados, compartirán espazo os dous clubs de remo centralizando, así, os servizos principais, a administración e as zonas de adestramento, pero mantendo unha independencia nos seus usos e organización. O edificio organízase, de tal maneira, que o uso de cada un dos clubs é independente, dividíndose en cada unha das plantas. Centralízase, unicamente, a entrada e a área de administración, que se divide en tres despachos e unha sala de reunións.
Na edificación 2, con 573 metros cadrados, mantense o uso actual, exponse como pañol de embarcacións. A intervención limítase a dotar de novos espazos que complementen o seu uso na ampliación da edificación 1, cun taller de reparacións e espazo para almacenaxe de remos. Substitúese, tamén, a cuberta de lona.
Con respecto ás actuacións na edificación 3, con 574 metros cadrados construídos, limparase de todos os anexos posteriores, reducindo a edificación ao volume principal e orixinal. Interiormente baléirase completamente deixando un espazo aberto para almacén de embarcacións do Club de remo e o Club de vela. Na súa parte posterior, está a edificación 4 (225 metros cadrados), limparase deixando só os pórticos metálicos e a cuberta, e será un espazo de almacenaxe a maiores para os clubs.
A edificación 5 é o “tinglado” e ten 355 metros cadrados de superficie. Acondicionarase o espazo para catro vestiarios do club de vela, dous aseos e prevese a creación dun ambigú, que será un punto de referencia non só para os integrantes dos clubs, senón tamén un punto de encontro para os cidadáns.
E a edificación 6, con 140 metros cadrados, pertence na actualidade ao Grupo Bazán e ao Club Actividades Subacuáticas Ferrol. Os espazos deste edificio están destinados a uso administrativo con dous despachos e unha sala de uso polivalente. Mantense tanto a distribución como os usos do mesmo, e unicamente procederase á limpeza e saneado das súas fachadas e cuberta.
Ademais, a ponte para o tren ao porto exterior inclúe unha pasarela peonil e ciclista, que permitirá facer da enseada de A Malata un roteiro circular coa que, ademais, abrirase á cidadanía a futura Cidade náutica de A Cabana. Así, tal e como me comprometín- recordou o rexedor- calquera persoa poderá ir dende A Graña a Caranza vendo o mar, son 10 quilómetros para pasear e facer deporte.
Dacordo co plan de mobilidade esta senda peonil e o carril bici, conectarán, no próximo ano, os barrios de A Graña, A Cabana, Serantes, Ferrol Vello, A Magdalena, Esteiro e Caranza. E no 2030, Ultramar, San Xoán, A Gándara, o Ensanche Santa Mariña e Canido.
DIRECCIÓN DE OBRA
A XGL adxudicou tamén o Lote1 Servizo de dirección de obra á empresa UTE Proyfe-Montero Parapar (35.090 euros), o Lote 2 Servizo de dirección de execución de obra a Investigación y Control de calidad S.A Unipersonal (INCOSA) (33.880 euros) e o Lote 3 Servizo de coordinación de seguridade e saúde á empresa Ingeniería y Prevención de riesgos S.L. (11.858 euros).
Rey Varela expresou o seu desexo de que as obras poidan comezar antes do verán, “a Cidade náutica fará de Ferrol unha referencia nestes deportes”, afirmou, ao tempo que asegurou que “os máis de 250 deportistas de deportes náuticos terán as instalacións que merecen”.
O proxecto da Cidade do Deporte conta cun convenio de colaboración coa consellería de Deportes da Xunta de Galicia e é susceptible de ser financiado polo Fondo Europeo de Desenvolvemento Rexional (Feder) dentro do Programa Plurirrexional de España 2021-2027.
