Pedro Blanco e Aina Calvo repasaron ás necesidades e circunstancias que se producirán en Galicia nos meses de xullo e agosto. Ambos coincidiron en sinalar a excepcionalidade deste verán en Galicia, ao confluír a tradicional chegada de persoas visitantes coa prevención dos lumes forestais e, en concreto, co eclipse total do 12 de agosto. Con respecto ao eclipse, o delegado trasladou á secretaria de Estado a expectación que se está xerando ao redor deste fenómeno en Galicia, pois é unha das Comunidades nas que mellor se poderá apreciar o eclipse, tanto en tempo como en extensión do territorio.
Pedro Blanco trasladou a Aina Calvo os avances na organización dos dispositivos de mobilidade e de atención á cidadanía que coordina a Delegación do Goberno en Galicia segundo as indicacións da Comisión Interministerial e dos grupos de traballo establecidos polo Goberno de España.
Infraestruturas
Pedro Blanco e Aina Calvo repasaron os proxectos que están en execución e os previstos para mellorar as Infraestruturas de Seguridade do Estado en Galicia. O delegado trasladou á secretaria de Estado a transcendencia de obras que se están a executar e das que se van iniciar, como o Cuartel da Garda Civil de Cambados ou o novo Cuartel da Fonsagrada.
Tamén repasaron os proxectos incluídos na recente aprobación da segunda fase do Plan Extraordinario de Infraestruturas para a Seguridade de Estado (Plise II), que permitirá acometer a construción de novas comisarías de Policía Nacional en Lugo, Ferrol e Pontevedra, cun investimento conxunto de 26,5 millóns de euros.
Comisaría de Policía Nacional de Santiago
Na reunión, o delegado e a secretaria de Estado avaliaron as solucións provisionais adoptadas diante dos danos causados polo lume do 12 de febreiro pasado na Comisaría de Santiago.
Ambos coincidiron na necesidade de dar solucións á cidadanía que permitan un acceso axeitado a servizos tan básicos como a formulación de denuncias ou a elaboración de documentos de identificación, ao tempo que garantan condicións de traballo axeitadas para axentes e persoas funcionario. Para garantir ambos aspectos, habilitarase un local específico no barrio de Santa Marta que acollerá, no menor espazo de tempo posible, os principais servizos de atención á cidadanía (DNI e denuncias) así como outras unidades policiais. Con respecto á reparación dos danos causados no edificio da Avenida de Padrón, a Secretaría de Estado traballa coa vontade de axilizar a reparación da comisaría para restablecer a normalidade o antes posible.
