Despois de máis de 10 anos, OBK volveu entrar nun estudo o pasado ano para gravar un novo álbum. O título do traballo é Vértigo, contén 9 novos temas, e dálle tamén nome á xira do grupo techno-pop: Vértigo tour. OBK chega ao Teatro Afundación de Vigo co seu Vértigo tour mañá sábado 23 de maio ás 21.00 h. Hai entradas dispoñibles en Ataquilla.com.
Aseguran dende OBK que Vértigo é un disco que reflicte a «madurez creativa» do grupo e a súa «paixón renovada polas melodías envolventes, os sintetizadores e as letras directas».
35 anos de éxitos
Jordi Sánchez e Miguel Arjona crearon OBK en 1991 en Sant Feliu de Llobregat coa idea de desafiar as correntes musicais do momento en España cunha aposta radical pola música techno-pop. O traballo co que debutaron, Llámalo sueño, definiu a linguaxe musical e emocional do dúo, edificada sobre o son dos sintetizadores. Durante dúas décadas, OBK asinou himnos xeracionais como Historias de amor ou El cielo no entiende. Venderon máis de millón e medio de copias e consolidáronse como os grandes pioneiros da electrónica melódica en España.
O ano 2012 marcou un punto de inflexión coa saída de Arjona: Jordi Sánchez asumiría o liderado en solitario do proxecto.
Dende entón, Sánchez gravou dous discos de estudo e un disco en directo en México en 2016. E durante dez anos non houbo novos discos de OBK. Ata que en 2026, o co-fundador de OBK lanzou Vértigo. O disco reúne novas composicións producidas Jordi Sánchez canda Apollo Vice e un conxunto de novos talentos da escena electrónica nacional e internacional. O resultado é unha viaxe intensa por diferentes atmosferas e emocións, mantendo intacta a esencia melódica que acompañou ao grupo desde os seus inicios.
Os novos temas de Vértigo soarán no concerto do día 23 de maio no Teatro Afundación de Vigo. Tamén os seus grandes éxitos, moitos deles convertidos en himnos dende hai máis de tres décadas polo público de OBK.
Será a penúltima cita do mes coa música pop no Teatro Afundación. Xa o día 30, o grupo Maldita Nerea comparece cun concerto acústico. Comezan a escasear as entradas.
