“Hai actos que recoñecen traxectorias e hai actos que, ademais, axudan a construír futuro”. Así definiu David Regades, delegado do Estado na Zona Franca de Vigo, a importancia dos Premios ARDAN, que cada ano outorga o CZFV para premiar a excelencia empresarial galega. Foi na rolda de prensa previa á Gala de entrega dos premios, que se celebrará o vindeiro xoves 4 de xuño ás 19,00h no Palacio de Congresos Mar de Vigo. “Os Premios ARDAN son unha ferramenta de referencia, dixo Regades, empresas capaces de destacar en ámbitos decisivos como a solvencia, o crecemento, a rendibilidade, a produtividade, a innovación, a internacionalización, a sostibilidade, o talento ou a igualdade”.
Este ano serán 14 as compañías premiadas con 5 e 4 indicadores de excelencia. 9 delas están na área de Vigo, 1 en Lalín, 1 no Grove, 2 na provincia da Coruña e 1 na de Ourense. Ceamsa no Porriño; Cuvidasa en San Cibrán das Viñas; Hermasa en Vigo; RodaVigo en Mos; Torus Software da Coruña; CZ Vaccines no Porriño; e Inasus de Lalín, presentan 5 indicadores ARDAN. Pola súa banda, con 4 indicadores conseguen o Premio ARDAN as empresas Optase Solutions de Vigo; Borgwarner Emissions de Vigo; Grupo Bermúdez de Carral, A Coruña; Ictel Enxeñeiros, de Vigo; o Náutico de San Vicente do Grove; Quobis Networks do Porriño; e Velneo do Porriño. Ademais, ABANCA será galardoada co Premio Especial á Traxectoria Empresarial.
