Entre os asuntos aprobados na xunta de goberno destaca a incorporación ao patrimonio municipal do quiosco da Praza Maior, un paso necesario para avanzar na súa recuperación e posta en uso. O Concello acometerá agora traballos de baleirado, limpeza e acondicionamento co obxectivo de habilitar neste espazo un baño público e un punto de información turística, ampliando así os servizos dispoñibles nun dos lugares máis emblemáticos da cidade.
A Xunta de Goberno deu tamén luz verde á contratación do servizo de cociña, comedor e lavandería da Escola Infantil Gregorio Sanz (234.000 €). O actual contrato remata o 31 de xullo de 2026 e o Goberno municipal decidiu anticiparse para garantir a continuidade desta prestación sen riscos nin interrupcións para as familias usuarias do centro.
No ámbito da seguridade, aprobouse a contratación do servizo de mantemento dos sistemas de protección contra incendios dos edificios municipais (con contrato caducado dende 2022), que inclúe a revisión de extintores, sistemas de detección e alarma, sinalización de emerxencia e outros elementos esenciais para garantir a seguridade das instalacións. O actual Goberno considera prioritario poñer ao día estes controis e asegurar que todos os equipamentos municipais cumpran as condicións de seguridade esixibles.
A sesión serviu tamén para avanzar na contratación do servizo de roza das pistas municipais. Trátase dun contrato que debería estar xa operativo nesta época do ano e cuxa tramitación foi necesario acelerar para evitar máis demoras nun servizo básico para a zona rural.
Ademais, aprobouse o proxecto para a obra de renovación integral da pista de atletismo Gregorio Pérez Rivera (679.980 €), continuando coa mellora das instalacións deportivas municipais e dando resposta a unha demanda histórica dos usuarios deste equipamento.
Tamén se aprobou un plan de mellora e control das colonias felinas e formación e concienciación social no Concello de Lugo.
Asemesmo deuse conta do nomeamento como director xeral de urbanismo Javier Arias Fouz.
A Xunta de Goberno acordou igualmente a prórroga do servizo de soporte, mantemento e actualización da plataforma municipal de venda de entradas e a contratación a Cogami da subministración de material de imprenta reservada a centros especiais de emprego de iniciativa social
Desde o Goberno municipal destacan que estes acordos reflicten a vontade de seguir avanzando na mellora dos servizos públicos e actuar con previsión na xestión dos contratos municipais.
