O alcalde de Ferrol, José Manuel Rey Varela, presidiu esta mañá no salón de recepcións o acto de entrega dos premios Sicted de calidade turística en destino a un total de 24 empresas, entidades ou persoas relacionadas co ámbito.
O rexedor felicitou aos premiados, que nesta ocasión foron A Vaca, Café Vanessa, Casa Juan, Central Librera Real, Doniños Paraíso, peluquería Sabi, restaurante A Maruxaina, Anfitrioners, Autoridade Portuaria Ferrol-San Cibrao, Autos Camilo, Boss Ferrol, Centro BTT Esmelle, Fundación Exponav, Jorge Severo Medina (guía de turismo), O Bacoriño, Oficina de Turismo de Atención ao Peregrino, Óscar Rodríguez Formoso (taxista), Secret Galicia, Radio Taxi Ferrol, restaurante O Parrulo, Parador de Turismo de Ferrol, Occidente Diseño y Comunicación, Viajes Galitur e Viajes Paco.
O Sicted, Sistema Integral de Calidade Turística en Destinos, é un proxecto de mellora continua que ten como obxectivo garantir unha experiencia turística de calidade aos visitantes, e que hoxe reciban este selo de calidade “é o froito dun traballo diario, dun esforzo constante por ofrecer servizos de maior calidade e da adaptación ás novas demandas dos consumidores”, apuntou o alcalde. Rey Varela subliñou que “o verdadeiro reto é ofrecer experiencias memorables e unha atención que faga que quen chega a Ferrol queira volver. Vós contribuídes a construír a imaxe que proxectamos da nosa cidade”.
Pola súa banda, a concelleira de Turismo lembrou que este recoñecemento que hoxe recibiron demostra que “entendedes a calidade non como unha meta, senón como un camiño de mellora permanente”. Así mesmo agradeceu o seu compromiso por que “o noso destino sexa cada día máis competitivo, atractivo e acolledor”.
O Instituto de Turismo de España e a Federación Española de Municipios e Provincias é o organismo que promove este sistema, do que Ferrol forma parte desde o ano 2012
