A Xunta de Goberno local aprobou as bases das subvencións para o fomento e promoción da educación física e do deporte a clubes e entidades deportivas, en réxime de concorrencia competitiva, para o ano 2026.
O Concello de Ferrol, no marco das súas competencias, ten, entre as súas prioridades, a concesión de axudas económicas destinadas á promoción do deporte co obxectivo de contribuír a que as entidades privadas sen ánimo de lucro dispoñan de medios para o cumprimento dos seus obxectivos e para que actúen como motores e garantes da participación cidadá nos seus ámbitos de actuación.
No marco destas axudas, subvencionaranse actividades levadas a cabo por clubes e entidades deportivas mediante a participación en competición deportivas federadas e as actividades levadas a cabo por clubes e entidades de base de iniciación deportiva e fomento da práctica deportiva non federada.
Poderán ser beneficiarias as entidades deportivas sen ánimo de lucro con sede social en Ferrol e que teñan por obxecto o fomento e o impulso da práctica continuada dunha ou varias modalidades deportivas, así como a participación en actividades e competicións deportivas calquera que sexa o seu nivel.
A contía total que o Concello mobiliza para estas subvencións é de 180.000 euros. O prazo de presentación das solicitudes será de 15 días hábiles contados a partir do día seguinte ao da publicación da convocatoria no Boletín Oficial da Provincia de A Coruña.
