O Concello destinará máis de 700.000 euros ao Plan de accións de mellora que se executará nos centros educativos públicos da Coruña durante este verán, unha medida promovida polo Goberno local co obxectivo de reforzar as actuacións de mantemento e conservación que xa se levan a cabo nas instalacións de titularidade municipal ao longo do curso.
A alcaldesa, Inés Rey, informou hoxe da folla de ruta que seguirá o Concello ata mediados de setembro, aproveitando o descanso da actividade escolar e xa con vistas ao vindeiro curso 2026-27. Ata entón, está previsto actuar en 25 instalacións repartidas polos dez distritos da cidade. Colexios, centros de educación especial e escolas infantís municipais nos que se acometerán medio cento de intervencións formuladas para darlle resposta ás necesidades cotiás do alumnado e o profesorado.
Un dos 25 centros educativos públicos nos que intervirá o Concello será o CEIP Concepción Arenal, onde Rey presentou esta mañá o plan establecido polos servizos municipais nesta tempada estival. «Non é unha cuestión menor. Vimos advertindo, desde hai tempo, de que a Xunta non pode descargar nos concellos a responsabilidade de atender as necesidades estruturais dos colexios públicos. Hai numerosos centros educativos da Coruña nos que, pola antigüidade das súas instalacións, cómpre actuar para remodelalas e adaptalas aos tempos actuais, tanto no relativo ás infraestruturas como en cuestións que afectan ao día a día do alumnado, como é a accesibilidade ou a climatización das aulas», dixo.
A rexedora, acompañada polo concelleiro de Educación, Formación e Innovación Tecnolóxica, Juan Ignacio Borrego, lembrou que o Concello, unha Administración local, «xa está a destinar moitísimos recursos propios ás tarefas de mantemento, xardinaxe, conserxaría e limpeza nos colexios». Cada ano, 6 millóns de euros, aos que se suman os 450.000 que permiten desenvolver a programación de lecer organizada coa Federación de ANPA, «actividades extraescolares que son vitais para a conciliación familiar, e, ademais, para promover a convivencia e interrelación de moitas nenas e nenos coruñeses».
Melloras en colexios de todos os distritos, como Elviña, Monte Alto e Cidade Vella
Na rolda de prensa desta mañá, Inés Rey detallou máis polo miúdo as accións previstas polo Concello nos 25 centros educativos públicos nos que se actuará este verán.
Son os CEIP Concepción Arenal, Alborada, Manuel Murguía, María Barbeito, María Pita, Cidade Vella, Rosalía de Castro, Sagrada Familia, Sal Lence, Salgado Torres, San Francisco Javier, San Pedro de Visma, Torre de Hércules, Víctor López Seoane, Wenceslao Fernández Flórez, Emilia Pardo Bazán, Raquel Camacho, José Cornide, Eusebio da Guarda e Zalaeta.
Ademais, tamén haberá melloras no centro de educación especial (CEE) Nosa Señora do Rosario e nas escolas infantís municipais da Carricanta (Castrillón), Caracola (Novo Mesoiro) e sumaranse os equipamentos necesarios para a nova EIM de Monte Alto.
«Non é unha declaración de intencións, senón todo o contrario: xa estamos en marcha porque non hai tempo que perder», expresou Rey, que informou de que estes días se está a traballar na renovación da cuberta na EIM Carricanta e, ademais, remataron as tarefas de impermeabilización parcial da cuberta no Nosa Señora do Rosario.
Estas medidas abren camiño a máis actuacións como as que se executarán no CEIP María Pita, onde o Concello abordará a adecuación dun camiño de terra que dá acceso ao colexio. Tamén no CEIP María Barbeito e Cerviño, onde se renaturalizará o patio para que os seus espazos exteriores gañen unha segunda vida, sumen máis áreas verdes e superficies de xogo máis amplas e osixenadas. E, xa nos vindeiros días, comezará a renovación do parque infantil do CEIP Concepción Arenal, que sumará equipamentos de xogo máis modernos, un firme renovado e máis capacidade para a rapazada.
Inés Rey pídelle á Xunta máis orzamento e implicación co ensino público
Esta mañá, no colexio, Inés Rey insistiu na necesidade de que a Xunta de Galicia asuma as súas competencias e se responsabilice co ensino público con máis planificación e orzamento, que posibilite adecuar as infraestruturas dos centros educativos coruñeses ás súas necesidades do alumnado.
Rey puxo como exemplo a realidade do Concepción Arenal: «Insistimos en que é necesario contar coa implicación da Xunta para actuar de forma integral. O tellado do colexio esixe unha rehabilitación total e este tipo de obras son de competencia autonómica, porque van moito máis alá dunha reparación puntual».
A alcaldesa recordou que o caso do CEIP Concepción Arenal «non é o único no que temos constatado a falta de interese da Xunta pola cidade da Coruña. Tamén foi evidente co colexio da Cidade Vella e a súa deterioriada rampla de acceso, instalada pola Xunta, con protestas e mobilizacións das familias e veciños que foron máis que xustificadas.
Aquela rampla de madeira supuxo un problema co paso do tempo. Por iso, e como moi tarde entre setembro e outubro, o Concello asumirá a construción dunha nova rampla de pedra no acceso principal ao colexio. «Porque esta cuestión, ao igual que outras moitas na cidade, non se pode demorar máis», dixo a alcaldesa, que avanzou que no último trimestre do ano non só se actuará no CEIP Cidade Vella, senón que tamén está pensado facelo no Nosa Señora do Rosario -coa rehabilitación do patio- e no colexio Eusebio da Guarda, para garantir melloras de accesibilidade na súa entrada, suprimindo as barreiras arquitectónicas existentes.
