O alcalde de Ferrol, José Manuel Rey Varela, presentou esta mañá no salón de recepcións o XXIV Tríatlon Cidade de Ferrol Campionato Xunta de Galicia 2026 no que se darán cita preto de 220 deportistas. No acto participaron o triatleta Javier Gómez Noya, a delegada da Xunta en Ferrol, Martina Aneiros, o presidente da Federación Galega de Atletismo, Javier Campos, o edil de Deportes, Ricardo Aldrey, e o presidente do Tríatlon Ferrol, José Antonio Formoso, Cali.
A cita forma parte da Liga Galega de Tríatlon e ademais este ano é puntuable para o ranking nacional de tríatlon, o que fará que triatletas de fóra de Galicia participen neste campionato.
Ademais, na mesma xornada, organizarase o clasificatorio Youth para o Campionato de Europa de Melilla. A competición reunirá aos mellores talentos nacionais da categoría xuvenil nunha cita clave para definir a selección española que representará a España no Europeo.
“Estamos ante unha oportunidade única de ver en acción ás promesas que marcarán o futuro deste deporte”, declarou Rey Varela. “Campionatos como este son moi importantes porque crean camiño e apostan polos valores que representa o tríatlon: esforzo, sacrificio e perserverancia”. Estes son tres atributos que se atopan nunha das lendas desta disciplina: o ferrolán Javier Gómez Noya. O rexedor puxo en valor a súa traxectoria deportiva, con cinco títulos mundiais de tríatlon e unha medalla de prata nos Xogos Olímpicos de Londres 2012, entre outros. “A súa presenza hoxe aquí, lémbranos que é un dos mellores embaixadores deste deporte e que, desde Ferrol, traballando xuntos, todo se pode acadar con esforzo e dedicación”, engadiu o alcalde.
Ao fío disto, lembrou o “compromiso inquebrantable do Concello co deporte”, facendo alusión ao maior proxecto neste ámbito que se está a desenvolver: a Cidade do Deporte.
Pola súa banda, Gómez Noya amosouse “encantado” de apoiar este tríatlon de Ferrol “no que competín en numerosas ocasións”. “Aquí, lembrou, forxei a miña carreira deportiva”. O ferrolán agradeceu ao Concello de Ferrol a súa disposición, “sempre disposto a axudar”, e a organización deste evento así como á Federación Galega de Atletismo e ao Club Triatlón Ferrol por promocionar este deporte. Gómez Noya finalizou as súas palabras destacando que vai ser “un sábado intenso con moitas probas de diferentes categorías e animo a toda a xente a que saia ás rúas de Ferrol e anime aos deportistas”.
A delegada da Xunta puxo en valor a figura do laureado triatleta, así como o traballo conxunto da organización que posibilita que “o sábado sexa unha festa do deporte, nunha cidade moi ligada ao tríatlon”.
COMPETICIÓN
Javier Campos e José Antonio Formoso foron os encargados de afondar nos detalles da competición. Ás 15:30 e ás 16:45 horas terá lugar a saída da proba feminina e masculina, respectivamente, de Liga. As distancias a completar serán 750 metros de natación, 20 quilómetros en bicicleta e cinco quilómetros de carreira a pé.
Ás ás 18:30 horas terá lugar a saída feminina do clasificatorio Youth e ás 19:15 horas a de masculino Youth. Neste caso, terán que completar 300 metros a nado, 10 quilómetros en bicicleta e dous quilómetros de carreira.
Durante a presentación lembrouse que ese mismo 18 de xullo, en horario de mañá, terá lugar o Tríatlon de Menores Campionato Xunta de Galicia que quedara aprazado pola vaga de calor. Nel participarán 230 nenos e nenas.
