O 112 Galicia recibiu o primeiro aviso por mor deste suceso un cuarto de hora despois das 8:00. Segundo a información aportada por varios particulares, dous turismos colidiran no quilómetro 68 da PO-552, cun dos ocupantes sen ser capaz de saír do interior do seu turismo. Ademais, logo do impacto, un terceiro vehículo bateu contra un dos coches accidentados.
Rapidamente, os xestores do 112 Galicia informaron ao Servizo de Urxencias Sanitarias de Galicia-061, aos Bombeiros do Baixo Miño, ao GES da Guarda, á Garda Civil e á Agrupación de Voluntarios de Protección Civil de Tomiño.
Unha vez no punto, foi preciso excarcerar para liberar a un dos condutores dun dos vehículos. Houbo un total de tres feridos, dous deles trasladados.
Liberada unha persoa tras unha saída de vía en Oroso
Aconteceu arredor das 8:30 horas., na rúa Estación. Segundo informou o alertador ao 112 Galicia, unha furgoneta envorcara, de maneira que o ocupante non podía saír ao exterior.
Con estes datos, desde a Sala de Operacións informouse ao Servizo de Urxencias Sanitarias de Galicia-061, aos Bombeiros de Ordes, á Garda Civil de Tráfico, á Policía Local e á Agrupación de Voluntarios de Protección Civil de Oroso.
A dotación de bombeiros tivo que empregar o material de excarceración para liberar ao implicado. Ademais, foi preciso levar a cabo labores de limpeza na vía logo de producirse o accidente.
