O delegado do Goberno en Galicia, Pedro Blanco, felicitou á Asociación de Xornalistas de Santiago de Compostela polos seus 80 anos de vida e reivindicou o traballo do xornalismo local en Galicia. Pedro Blanco participou no acto de benvida aos participantes na LXXXV Asemblea da Federación de Asociacións de Xornalistas de España (FAPE), celebrada na Facultade de Xornalismo da Universidade de Santiago co gallo do 80 aniversario de Asociación de Xornalistas de Santiago de Compostela (APSC).
Pedro Blanco salientou a importancia da prensa como motor dunha sociedade crítica e plena de conciencia que busca mellorar colectivamente cada día. Agora ben, neste senso, fixo fincapé no papel que xogan as redaccións locais como tecedoras das vilas e cidades. “A súa proximidade e vontade de servizo público mellora a vida da veciñanza ao garantir o dereito á información para ela independentemente de onde viva”.
Xusto por iso, “grazas á súa resistencia, informando e acompañando a Santiago e a Galicia”, Pedro Blanco incidiu na longa vida da Asociación de Xornalistas compostelá. Instou aos seus integrantes, liderados pola presidenta Xulia Campo, a seguir traballando desde a súa propia vocación, “pola información rigorosa e de calidade e por Santiago de Compostela”.
