A Deputación da Coruña destina este ano 206.500 euros ao apoio directo aos deportistas máis destacados da provincia, a través do seu programa de bolsas deportivas. O Boletín Oficial da Provincia publica hoxe a resolución definitiva da convocatoria correspondente ás modalidades olímpicas, que concede 59 bolsas de 3.500 euros cada unha.
As axudas distribúense entre diferentes grupos de idade, desde deportistas de 12 anos ata maiores de 33, e abarcan disciplinas como atletismo, natación, taekwondo, remo, piragüismo, halterofilia, judo, bádminton, vela, tríatlon, golf ou skateboard.
Entre as persoas beneficiarias desta edición figuran algúns dos nomes máis destacados do deporte galego e español, como a atleta ribeirense Ana Peleteiro, medallista olímpica, ou a mugardesa Belén Toimil, referente do lanzamento de peso español e internacional coa selección española. Tamén reciben bolsa deportistas cunha destacada traxectoria en disciplinas como a natación, o remo, o piragüismo, o taekwondo ou a halterofilia.
O deputado de Deportes, Antonio Leira, destacou que «estas bolsas son unha aposta directa polo talento deportivo da provincia e, sobre todo, polo enorme esforzo que hai detrás de cada deportista e das súas familias».
«Chegar ao máis alto nivel require moitas horas de adestramento, desprazamentos, material e compatibilizar o deporte coa formación académica e coa vida persoal. Desde a Deputación queremos contribuír a que as nosas e os nosos deportistas poidan seguir avanzando e competindo nas mellores condicións posibles», afirmou Leira.
O deputado lembrou que o programa provincial ten servido durante anos como apoio na progresión de deportistas que posteriormente acadaron éxitos nacionais e internacionais. Ana Peleteiro, o boxeador coruñés Emmanuel Reyes, medallista de bronce nos Xogos Olímpicos de París, o piragüista betanceiro Carlos Arévalo ou Belén Toimil son algúns dos deportistas da provincia que contaron con estas bolsas ao longo das súas carreiras.
O programa chegará este ano ás 63 bolsas
Antonio Leira anunciou ademais que proximamente se publicará a concesión doutras catro bolsas de 3.500 euros destinadas a deportistas de modalidades non olímpicas, unha novidade coa que a Deputación amplía o alcance do programa. Con elas, serán 63 os deportistas apoiados directamente pola institución provincial en 2026.
«Queremos que estas axudas cheguen a máis deportistas e tamén a máis modalidades. O deporte provincial ten cada vez máis nivel e a nosa responsabilidade é acompañar ese talento e crear as condicións para que poida seguir medrando», sinalou Leira.
Seguir incrementando as bolsas a deportistas en 2027
O deputado avanzou tamén que o goberno provincial traballa xa na creación doutras nove bolsas para o vindeiro ano, co obxectivo de seguir ampliando progresivamente o programa.
«Este apoio da Deputación ten un impacto importante na carreira dos deportistas, especialmente cando comezan. Por iso queremos seguir aumentando o número de bolsas e consolidar este programa como unha ferramenta estable de apoio ao deporte de alto nivel da provincia», concluíu.
O goberno de Valentín González Formoso incrementou nos últimos anos tanto o número como a contía destas bolsas, destinadas a facilitar que os deportistas poidan compatibilizar a práctica deportiva de alto nivel coa súa formación académica e persoal.
A Deputación mantén tamén o seu compromiso coa igualdade no deporte, a través do apoio ao deporte feminino e de diferentes programas de sensibilización e formación destinados a reducir a brecha de xénero, combater estereotipos e fomentar novos referentes para as xeracións máis novas.
