O subdelegado do Goberno na Coruña, Julio Abalde, presentou hoxe no Centro de Xestión de Tráfico do Noroeste-Cantábrico, con sede na Coruña, a Primeira Operación Especial de Tráfico do Verán 2026, que coordinará a mobilidade en Galicia, Asturias e Cantabria desde as 15:00 horas deste venres 3 de xullo ata as 24:00 horas do domingo 5.
Na presentación participou tamén a coordinadora da Dirección Xeral de Tráfico en Galicia, Victoria Gómez Dobarro; o coronel Xefe do Sector de Tráfico da Garda Civil en Galicia, Antonio Hidalgo, e o director do Centro de Xestión de Tráfico do Noroeste-Cantábrico, Bruno Deschamps.
Durante esta primeira operación saída, a Dirección Xeral de Tráfico prevé 413.000 desprazamentos nas estradas galegas, coincidindo co inicio das vacacións para milleiros de persoas e coa primeira fin de semana completa de xullo.
Por provincias, estímase que 149.000 vehículos circularán por Pontevedra, 142.000 pola provincia da Coruña, mentres que Lugo e Ourense rexistrarán 61.000 desprazamentos cada unha.
Julio Abalde destacou que este dispositivo forma parte da campaña especial de verán, que permanecerá activa ata o próximo 6 de setembro. Ao longo do mes de xullo prevese que as estradas galegas soporten 4.550.000 desprazamentos, dos que 1.641.000 corresponderán a Pontevedra, 1.567.000 á Coruña, 671.000 a Lugo e 671.000 a Ourense.
O subdelegado lembrou que o verán concentra un importante incremento da mobilidade cara ás zonas costeiras, praias, destinos turísticos e localidades que celebran festas patronais, así como un maior número de desprazamentos de curto percorrido, nos que adoita producirse un exceso de confianza ao volante. “Quero facer un chamamento á prudencia”, apelou o subdelegado. “É fundamental planificar a viaxe, revisar o vehículo antes de saír, evitar as horas de maior intensidade de tráfico, descansar as veces que sexa necesario e, por suposto, respectar os límites de velocidade e non conducir nunca baixo os efectos do alcohol ou das drogas. O mellor destino das vacacións é chegar con seguridade. Ese é o obxectivo polo que todos debemos traballar”, concluíu.
Para facer fronte ao incremento da circulación, o Centro de Xestión de Tráfico do Noroeste-Cantábrico dispón de 437 cámaras de televisión, 534 paneis de mensaxe variable, 406 estacións de toma de datos, 178 sistemas de recoñecemento automático de matrículas, 56 sensores meteorolóxicos e 63 profesionais, que permiten realizar un seguimento permanente da circulación e xestionar incidencias en tempo real. O dispositivo da Garda Civil de Tráfico contará cunha media de 600 axentes diarios en Galicia, con especial incidencia nas provincias da Coruña e Pontevedra. Motocicletas, vehículos, vehículos camuflados e vehículos radar son os medios materiais da Garda Civil de Tráfico, que fará fincapé nos controis de alcoholemias, e sobre todo atenderá á condución dos motoristas xa que a época estival é a peor para eles.
A Dirección Xeral de Tráfico recomenda planificar con antelación os desprazamentos e evitar, na medida do posible, as horas de maior intensidade circulatoria. O venres prevese un importante incremento do tráfico desde as 16.00 horas, o sábado as maiores dificultades concentraranse entre as 9.00 e as 14.00 horas e o domingo a partir das 18.00 horas. A DXT lembra tamén a importancia de revisar o vehículo antes de iniciar a viaxe, descansar adecuadamente, realizar paradas frecuentes, evitar o consumo de alcohol e drogas, utilizar sempre o cinto de seguridade e manter a máxima atención ao volante. Ademais, esta campaña será a primeira na que a baliza V-16 conectada terá un papel protagonista como elemento de sinalización en caso de avaría ou accidente.
