O alcalde de Ferrol, José Manuel Rey Varela, xunto cos presidentes da Junta General de Cofradías y Hermandades de la Semana Santa, Fernando Iguacel, e da Asociación de Empresarios de Hostalería de Ferrol e comarca, Emilio Vázquez, e acompañado da concelleira de Turismo, Maica García, presentou o balance do impacto turístico da Semana Santa 2026.
O rexedor comezou a súa intervención felicitando aos representantes das entidades implicadas e á edila “polo traballo e a organización destes días”, destacando que “sen ese esforzo colectivo non sería posible acadar o éxito que vivimos”. Subliñou ademais o papel da cidadanía, afirmando que “os ferroláns son os mellores embaixadores da cidade” e que “a marca Ferrol está de moda”.
A campaña de promoción turística Toque Ferrol, presentada a semana pasada, foi un anticipo do que se viviría na cidade. Cunha gran difusión en redes sociais e máis de 35.000 visualizacións, conseguiu transmitir “a esencia auténtica de Ferrol”, reforzando a súa imaxe como destino atractivo, afirmou o rexedor.
SEMANA SANTA HISTÓRICA
“Esta Semana Santa pasará á historia como a máis multitudinaria e emocionante que lembramos en anos”, afirmou Rey Varela. Máis de 400.000 persoas visitaron a cidade entre o Domingo de Ramos e o luns de Chamorro, xerando un impacto económico próximo aos 50 millóns de euros en sectores como a hostalería, a restauración, o comercio e o turismo.
Ferrol viviu unha intensa actividade, enchéndose de vida, emoción e tradición. A Semana Santa consolidouse como “a conxugación perfecta entre tradición relixiosa, cultura popular e expresión artística”, apuntou Rey Varela, proxectando a cidade ao exterior con identidade propia e orgullo colectivo.
O impacto turístico foi moi notable, acadando cifras que non se lembraban en anos. As oficinas de turismo rexistraron ata 2.400 visitantes atendidos, con presenza internacional de países como Italia, Arxentina, Alemaña, Reino Unido ou Estados Unidos.
E con respecto ao servizo de buses lanzadeira gratuítos desde o aparcamento de Fimo foi utilizado por preto de 4.000 persoas, contribuíndo a mellorar a mobilidade.
ÉXITO DAS VISITAS GUIADAS
As visitas guiadas acadaron tamén resultados excepcionais, revelou o rexedor. Espazos como o Arsenal Militar, Navantia, o Palacio de Capitanía, o castelo de San Felipe ou Ferrol Secreto sumaron 516 reservas, cunha ocupación do 97%.
Destaca tamén a afluencia ao castelo de San Felipe por libre con máis de 2.500 visitantes, ademais das visitas guiadas (81 persoas). Outros recursos culturais, como o Museo Naval rexistraron arredor de 700 visitantes e Exponav máis de 900.
A ocupación hoteleira alcanzou o 100% nos días principais e mantívose moi próxima a esa cifra no resto da semana.
En relación ao perfil de visitantes, que hai uns anos adoitaba ser máis de persoas adultas, xa maiores, cada vez estase diversificando máis, e atrae máis ao público novo, que veñen en grupos ou en parellas. E sen esquecer o tradicional “turismo sentimental” ligado ao servizo militar. En canto á súa procedencia, foi maioritariamente nacional, aínda que tamén houbo presenza internacional (Arxentina, Canadá, Reino Unido, Francia e Ucraína).
Rey Varela afirmou que “estes datos amosan que Ferrol é único”, e a Semana Santa é a conxugación perfecta de tradición, relixión e cultura popular, cunha dimensión artística e emocional que a fai inesquecible. “A Semana Santa fai un Ferrol en grande, proxectándoa ao mundo con identidade propia e cun fondo orgullo colectivo”, confirmou.
HOSTALERÍA E COMERCIO, AO COMPLETO
A hostalería, o comercio e os servizos locais beneficiáronse dunha afluencia masiva. Durante estes días, moitos establecementos colgaron o cartel de completo e unhas 20.000 persoas participaron na IV Festa do marisco, organizada pola Cofradía de Pescadores de Ferrol.
O presidente da Junta General de Cofradías y Hermandades de la Semana Santa, Fernando Iguacel, cualificou o balance como “un éxito total”, destacando o traballo das cinco confrarías ao longo de todo o ano e a saída de 24 procesións, algo pouco habitual. Hai un traballo incansable e anónimo de moitas persoas, e “a partir do 1 de setembro comezamos xa a organizar a Semana Santa de 2027”, avanzou. “Foi todo un exitazo”, concluíu Iguacel.
Pola súa parte, Emilio Vázquez sinalou que “facía moitos anos que non se vivía este ambiente na rúa”, destacando a plena ocupación en hoteis e restaurantes e a importancia de ofrecer unha boa experiencia aos visitantes. Vázquez destacou que “fixemos un bo traballo xuntos, vendimos a Marca Ferrol e así debemos continuar, xa que Ferrol merece a pena”.
FERROL MÁIS GRANDE
O alcalde concluíu destacando que estes datos “non só reflicten un impacto económico, senón tamén un fortalecemento da imaxe de Ferrol como cidade atractiva, con futuro e en crecemento”.
“A Semana Santa fai cidade, fai comunidade e proxéctanos cara ao exterior con orgullo”, afirmou, incidindo en que este éxito demostra que “Ferrol está de moda” e que “debemos seguir traballando xuntos nun Ferrol máis grande”.
