O alcalde de Ferrol, José Manuel Rey Varela, e a alcaldesa de Narón, Marián Ferreiro, anunciaron esta mañá a próxima sinatura dun convenio histórico que rexerá a colaboración interadministrativa entre ambos concellos para a xestión do servizo de depuración de augas. “O de hoxe é un día que marca un antes e un despois na relación entre dous concellos veciños”, declarou o alcalde.
O documento asinarase este mesmo mes e permite articular un mecanismo de cooperación para o financiamento compartido dos custos ordinarios do servizo, así como para a realización coordinada de actuacións materiais e técnicas. Cómpre destacar que este convenio non supón cesión da titularidade das infraestruturas nin das competencias.
Deste xeito, dase cumprimento á sentenza xudicial de febreiro de 2026, que recoñece a obriga do Concello de Narón de asumir a súa parte do custo do servizo e que tamén sinalaba a necesidade de establecer un instrumento específico de colaboración entre ambos concellos. A ausencia do mesmo provocou “desacordos e inseguridade xurídica”, manifestou o alcalde, que lembrou que “levábamos demasiados anos nunha situación que non beneficiaba a ninguén e desde a nosa chegada á alcaldía tiñamos claro que había que cambiar”. Por este motivo, “escollimos a vía do diálogo, porque entendemos que entre administracións que comparten infraestruturas, intereses e responsabilidades, o entendemento é obrigatorio, e este convenio é o resultado”.
O acordo recolle o ditado pola sentenza, sendo que o Concello de Narón deberá aboar 3,4 millóns de euros polo período comprendido entre abril de 2017 e xuño de 2023 (período en sede xudicial) e outros 2 millóns de euros polo período de xuño de 2023 a decembro de 2025, cando comezaron a funcionar elementos clave como os caudalímetros, que permiten medir con precisión o volume de auga tratado e así repartir os custos de maneira xusta. O Concello de Ferrol, ao peche de 2026, deberá ter recibido estes importes, que suman máis de 5,4 millóns de euros.
Desde xaneiro de 2026 o escenario cambia coa entrada en vigor deste convenio: calcularase un custo unitario por metro cúbico en base aos custos totais do servizo e aos volumes rexistrados. Así mesmo, as liquidacións serán trimestrais e o Concello de Narón deberá aboalas no mes seguinte á finalización do trimestre.
“Este modelo achega algo fundamental: trazabilidade e seguridade xurídica. Os importes estarán sustentados en datos obxectivos e cada responsabilidade estará claramente definida”, apuntou Rey Varela.
Cómpre lembrar que a diferenza entre o que debía pagar o Concello de Narón polo servizo recibido e o efectivamente aboado foi unha das causas, non a única -matizou o alcalde- que provocou un déficit significativo na empresa xestora, o que levou a que Emafesa entrara en causa de disolución.
“Máis aló das cifras, hoxe demostramos que a través do diálogo é posible resolver problemas que, durante anos, foron obxecto de controversia institucional e que, cando se antepón o interese xeral, pódense superar anos de desencontros”, afirmou Rey Varela. Ferrol necesitaba “poñer en marcha os grandes proxectos de transformación urbana” e tamén “dar un salto ao século XXI despois de anos de deterioro constante dos servizos municipais: dos parques e xardíns, de limpeza e do estado das rúas, un salto que se vai ver este ano despois de tres anos de intenso traballo e agora, faltábanos pechar o tema da auga con Narón” a través deste convenio, manifestou o alcalde.
Pola súa banda, Ferreiro declarou que “este acordo supón un paso importante para Narón porque achega seguridade, transparencia e xustiza a un servizo esencial como é a depuración das augas”. “Durante anos -continuou- defendemos que o reparto dos custos debía basearse en criterios obxectivos e verificables, e hoxe conseguimos que o pago se realice en función dos caudais reais vertidos por cada concello”. A alcaldesa de Narón rematou agradecendo “a disposición ao diálogo e ao entendemento institucional que fixo posible este acordo. Cando as administracións colaboran con lealdade e sentido común, quen gaña son os veciños e veciñas de Narón e Ferrol”.
O rexedor tamén concluíu as súas palabras agradecendo á alcaldesa o seu talante para “chegar a acordos e superar anos de enfrontamentos, superar o rencor na política, derribar muros e tender pontes” e desexou que “este diálogo que instauramos perdure no tempo e nos permita alcanzar novos obxectivos en torno a outros grandes temas”.
