O deputado do BNG no Congreso, Néstor Rego, celebra a votación final da proposición de lei para a transferencia da AP-9 á Galiza. Rego pon en valor o traballo realizado polo BNG para o desbloqueo e impulso da lei frente a un Partido Popular cunha folla de servizo en contra da transferencia á Galiza desta infraestrutura e responsábel de que as galegas e galegos continúen tendo un lastre como o que supón as peaxes da Autoestrada do Atlántico.
“Hoxe completamos unha tramitación dunha lei para a transferencia da AP-9 á Galiza que é un obxectivo fundamental da sociedade galega. É un día histórico porque levamos, tanto o BNG como o conxunto dos galegos e galegas, moitos anos de reclamacións que até agora sempre acabaron frustrándose polo bloqueo de PP e PSOE” sinala o deputado nacionalista o día en que se completa a tramitación da proposición de lei.
Rego lembra que o BNG vén reclamando a transferencia durante anos. “En 2014 o BNG rexistrou unha proposición de lei no Parlamento de Galiza, debatida e votada favorabelmente en 2016” recorda. Con todo, baixo a presidencia do Goberno do popular M. Rajoy e sendo Presidenta do Congreso a pontevedresa Ana Pastor, o Partido Popular vetou o seu debate e, polo tanto, a súa toma en consideración.
“Hoxe o Partido Popular pode votar a favor da transferencia, é a proba do algodón, mais xa sabemos que o PP votará en contra xustificando máis unha traizón á Galiza porque realmente o PP non quere a transferencia e tampouco quere aceptar o papel que tivo o BNG para que se conseguise a transferencia da AP-9” afirma con contundencia o deputado nacionalista.
Así mesmo, Néstor Rego critica a campaña de manipulación e mentiras difundida polo Partido Popular a respecto do texto conseguido polo BNG para a transferencia da Autoestrada do Atlántico á Galiza: “a propia letrada do Senado desmonta as mentiras do Partido Popular e a campaña de manipulacións” destapa.
“Non lles valerá de nada seguir coas mentiras” asevera Rego que agarda “que o Partido Popular non teña a tentación de bloquear a Comisión Mixta de Transferencias”. Neste sentido, o deputado do BNG reclama á Xunta de Galiza negociar o final da concesión –desa prórroga ilegal feita por Aznar- para deixar de lastrar á Galiza.
“A súa folla de servizos está clara: en 2000 fixeron a prórroga; en 2003, privatizárona; en 2016, vetárona; e agora votan en contra da transferencia” denuncia Rego durante a súa intervención. Pola contra, o BNG leva décadas reclamando a transferencia con catro proposición de lei aprobadas, conseguindo bonificacións de até 75%, desbloqueando a tramitación da Proposición de Lei, sacando adiante dúas resolucións que reclaman o final da concesión, etc.
“Queremos unha infraestrutura que sexa o motor do desenvolvemento social e económico do noso País e non un lastre” sentenza Néstor Rego, reafirmando o compromiso do BNG para conseguir unha AP-9 galega e libre de peaxes.
