A senadora do BNG, Carme da Silva Méndez, lamenta o veto do Partido Popular á moción nacionalista que instaba a rexeitar a nova normativa do Comité Olímpico Internacional (COI) de prohibir a mulleres trans e intersex participar na categoría feminina no deporte olímpico.
Despois da nova normativa aprobada polo COI, o Bloque Nacionalista Galego cualifica esta decisión de “reaccionaria, discriminatoria, que vai en contra da práctica deportiva e do espírito que debería de promover o Comité”. A decisión adoptada excluía as mulleres trans e intersex da práctica na categoría feminina no deporte olímpico, unha cuestión, ademais, “transfóbica e misóxina” que obedece máis a “unha decisión política que non está baseada en criterios científicos”.
“Baixo o falso argumento de promover a equidade expulsa moitas mulleres da práctica deportiva sen aportar ningún tipo de dato concreto que avale esta decisión. O COI está creando un problema que non existe” denuncia a senadora do BNG, Carme da Silva Méndez, lembrando que dos milleiros de deportistas que participaron en todas as olimpíadas celebradas até o momento, só se coñecen seis casos de persoas trans e intersex que participaran nalgunha delas: o único con medalla foi un home trans que tivo que competir no equipo feminino.
“Que lle estamos a trasladar ás nenas e adolescentes? Que non poden facer deporte” pregunta retoricamente a senadora do BNG. A decisión do COI, continúa Carme da Silva, é unha decisión “acientífica que xa se rexeitou hai máis de 30 anos e que vai en contra dos Dereitos Humanos”.
Contra un PP que quere estendelo a nivel estatal e que o compara co dopping
“O PP trae unha emenda a favor da decisión do COI e mesmo quere ir a máis trasladándoa á práctica deportiva no Estado español. O Partido Popular non quere que fagan deporte e os argumento que utilizan son, tamén, misóxino e transfóbicos” denuncia a senadora nacionalista. Así mesmo, sinala que que “non hai ningún estudo científico que diga que a testosterona sirva para aumentar a capacidade deportiva, máis ben o contrario”, do mesmo xeito que o propio científico descubridor do xén SRY, hai 30 anos que desbotou o xén como indicativo para expresar o sexo.
Alén do máis, Carme da Silva denuncia a comparación realizada polo Partido Popular entre as mulleres trans e as mulleres que exercen o dopping: “é gravísimo que se utilicen este tipo de comparacións que chegan ao insulto”.
Un PSOE que carece de dignidade
Por outra parte, a senadora do BNG sinala a pasividade do Partido Socialista que, no canto de ser un muro de contención contra discursos reaccionarios inspirados polas bancadas do Partido Popular, actúan cos brazos caídos á hora de defender os dereitos das persoas trans e intersex. “Non valen medias tintas na defensa dos Dereitos Humanos” sentenza.
