A deputada do Bloque Nacionalista Galego, Olalla Rodil, denunciou hoxe no Parlamento o que cualificou como unha “moción indecente” impulsada polo PP no Concello de Lugo e sostida co voto dunha concelleira tránsfuga, asegurando que detrás desta operación “non hai un proxecto de cidade, senón intereses partidistas, ambicións persoais e pactos escuros”.
Rodil afirmou con rotundidade que o PP “mercou o voto e a sinatura da concelleira tránsfuga valéndose do goberno da Xunta, utilizando os recursos das galegas e dos galegos para mercadear vontades e votos”, co único obxectivo de “facerse, pola porta de atrás, cun goberno que non lle deron as urnas”.
A deputada nacionalista puxo o foco na creación dunha praza na Xefatura do Litoral de Lugo, que segundo explicou foi xustificada pola suposta renuncia da persoa que ocupaba o posto. “Sacaron a praza co argumento de que renunciara, pero esa persoa non renunciara. Esa praza estaba ocupada. Por que mentiu a Xunta?”, preguntou.
Neste sentido, leu unha mensaxe enviada o propio 21 de abril, data na que se tramitou a praza: “Ten que marchar dun servizo no que está moi a gusto, no que os xefes o valoran moito e no que as compañeiras e compañeiros son excelentes, para darlle a praza a esa persoa? Isto é patético!”. Para Rodil, “non é patético, é caciquismo”, e exemplifica “os chanchullos do Partido Popular”.
A parlamentaria nacionalista advertiu de que “nun sistema democrático non se pode permitir o uso dos recursos públicos para cambiar gobernos, nin a compra de votos para manipular a vontade expresada pola cidadanía nas urnas”, nin tampouco “o uso partidista das institucións para saciar as ansias de poder do Partido Popular”.
Rodil sostivo que o acontecido en Lugo non é un feito illado, senón parte dunha forma habitual de actuar do PP. Como exemplo, lembrou o sucedido en Sarria en setembro de 2025, onde “foron mercar con cartos da Xunta a disolución do partido do goberno para que non se presente ás próximas eleccións municipais”, buscando así preparar “o camiño cara á Deputación Provincial”.
“Esta é a forma de facer política do Partido Popular”, resumiu, engadindo que “todo o que están a facer demostra a degradación que inunda o PP, da que se avergoñan boa parte dos seus concelleiros, militantes e votantes en Lugo”.
A deputada concluíu cunha mensaxe directa ao PP: “Lugo non se compra, porque nin a cidade nin a súa xente estamos á venda. Iso debera sabelo quen nos queira vir gobernar”.
