A senadora do BNG, Carme da Silva Méndez, participará na vindeira sesión de control ao Goberno do Estado para reclamar á Ministra de Seguranza Social aprobar de maneira inmediata a exención das cotas das mariscadoras galegas mantendo ese tempo como cotizado para que non perdan anos de cotización.
Os temporais dos pasados meses, alén de provocar un impacto ambiental nas Rías Galegas, ocasionou un impacto socioeconómico importante para o sector marisqueiro galego. De facto, calcúlase que se perdeu case a totalidade da colleita da campaña de marzo: 90% de berberecho, 95% de ameixa babosa e 60% da xapónica. A crise ambiental e produtiva, ademais, provocou o parón de actividade de todo o colectivo de mariscadoras e pon en risco a continuidade da actividade de máis de 3.000 mariscadores e mariscadoras, mulleres sobre todo, nos vindeiros anos.
«As mariscadoras non poden traballar porque non hai produto que recoller mentres centenares de familias dependen do marisqueo en importantes rías da Galiza como a de Noia, Arousa, Vigo ou Pontevedra, entre outras moitas» incide Da Silva Méndez.
Ante esta situación, a senadora nacionalista lembra que o BNG vén reclamando adoptar medidas urxentes que axuden a paliar as consecuencias da grave crise que está a provocar a mortalidade dos bivalvos nas Rías Galegas nas mariscadoras. «Xunta de Galiza e Goberno do Estado deben ter a vontade de activar medidas contundentes que contribúan a superar esta crise» aclara Carme da Silva, lembrando que as competencias en materia de marisqueo son principalmente da Administración Galega.
Con todo, Da Silva Méndez sinala que o Goberno do Estado «pode e debe adoptar medidas complementarias» entre as que salienta a exención das cotas das e dos mariscadores galegos mantendo ese tempo de parálise como cotizado para que non perdan anos de cotización.
Destaca, ademais, que o sector vive con inquedanza o cese da actividade presente, a falta de ingresos económicos e o que pode ocorrer no futuro máis inmediato se non se da unha recuperación dos bancos marisqueiros.
Contra o cambio climático, a favor das Rías Galegas
«Debemos atallar os efectos que está a provocar o cambio climático sobre as Rías Galegas. Por iso, o BNG, alén de reclamar medidas das administracións competentes, recentemente conseguiu un acordo co Ministerio de Agricultura, Pesca e Alimentación para que se realice un estudo exhaustivo sobre a produtividade das Rías Galegas» destaca Carme da Silva.
Neste sentido, a senadora do BNG sinala que se deben coñecer e estabelecer cales deben ser as medidas correctoras e as actuacións necesarias para restaurar a calidade ambiental plena e a produtividade das Rías Galegas.
