O alcalde destaca o crecemento poboacional, a mellora do alumeado público e a necesidade de reforzar o comercio local, sen pechar a porta a presentarse ás eleccións de 2027
O alcalde de Brión, Pablo Lago, pasou polos micrófonos de Radio Líder Santiago para facer balance do ano que rematou, analizar os principais retos do concello e debuxar o horizonte político e de xestión dos vindeiros meses. Nunha entrevista marcada polo ton reflexivo e pola proximidade propia destas datas do Nadal, o rexedor recoñeceu que “non está todo feito o que me gustaría”, pero subliñou que tanto el como o seu equipo de goberno poden estar “coa conciencia moi tranquila” polo traballo realizado.
Un dos asuntos centrais foi o estado das grandes obras pendentes, entre elas a estrada AC-543, unha infraestrutura clave para o municipio. Lago explicou que, tras os problemas derivados da situación da empresa adxudicataria, “o primeiro tramo xa está rematado” e confirmou que a nova empresa retomará os traballos “entre o 12 e o 15 de xaneiro”, coa previsión de concluír unha actuación que cualificou de “pendente e necesaria”. Tamén fixo referencia ao pavillón municipal, practicamente finalizado, aínda que admitiu que “podería terse rematado antes”.
Durante a conversa, o alcalde puxo en valor o crecemento demográfico de Brión e a súa situación estratéxica. “Estamos ao lado da capital, do aeroporto, da praia… e iso fai que Brión medre”, sinalou, lembrando que poucos concellos de arredor de 8.000 habitantes poden presumir de contar con “piscina climatizada, varios campos de fútbol e dous pavillóns”. Nese contexto, anunciou o inicio dunha promoción privada de vivenda nas inmediacións das residencias, animando á veciñanza e a posibles compradores a apostar polo municipio.
Outro dos eixos da entrevista foi a mellora do alumeado público, unha actuación que permitirá renovar arredor do 90 % dos puntos de luz grazas a financiamento europeo. Lago recoñeceu as queixas dalgúns veciños polo ton máis anaranxado das novas luminarias, pero aclarou que responden á normativa vixente: “Dan os mesmos lúmenes e, cando estean todas instaladas, haberá uniformidade e máis eficiencia enerxética”.
No ámbito económico, o rexedor amosou a súa preocupación pola falta de comercio local e fixo unha chamada á responsabilidade da veciñanza. “Se a xente non fai uso do comercio local, é moi difícil que se manteña”, advertiu, chegando mesmo a convidar publicamente a novos profesionais, como froiteiros, a instalarse no mercadillo semanal tras a recente xubilación dun dos postos.
A entrevista tamén abordou cuestións máis complexas, como a subida da taxa do lixo, que Lago vinculou directamente ás esixencias dunha normativa europea que obriga a repercutir o custo real do servizo. “Pasamos de pagar arredor de 500.000 euros a máis dun millón, e iso lastra a capacidade de investimento do concello”, explicou, defendendo a necesidade dunha nova ordenanza para garantir a viabilidade económica municipal.
No plano político, Pablo Lago destacou como un exemplo de responsabilidade o acordo alcanzado entre diferentes forzas para garantir a estabilidade en Brión. “Hai que apartar a política e pensar nos veciños; o importante é o traballo e os resultados”, afirmou, reivindicando a boa relación institucional tanto coa Xunta de Galicia como coa Deputación.
Preguntado polo seu futuro, o alcalde deixou a porta aberta á súa continuidade máis alá de 2027, aínda que sen confirmar nada: “Se non dou cumpridos os obxectivos aos que me comprometín, non ten sentido seguir. Isto non é para toda a vida”. De cara a 2026, marcou como desexos prioritarios a posta en marcha dun novo auditorio, melloras no CEIP e o cumprimento dos compromisos recollidos nos orzamentos autonómicos.
A entrevista pechouse cunha mensaxe de Nadal e fin de ano á veciñanza, desexando “saúde, ilusión e novos retos” para o ano que entrou, nun Brión que, segundo o seu alcalde, “segue medrando e mirando ao futuro con responsabilidade”
