O 112 Galicia tivo constancia deste accidente pasados uns minutos das 0:30 horas, a través do sistema automático de aviso do teléfono dun dos implicados. O sinistro, que deixou dúas persoas feridas, rexistrouse no quilómetro 16 da LU-651, na parroquia de Vilamor (Folgoso do Courel).
De inmediato, desde o Centro Integrado de Atención ás Emerxencias solicitouse a colaboración de Urxencias Sanitarias de Galicia-061, dos Bombeiros de Monforte, do GES de Quiroga, da Garda Civil de Tráfico, dos voluntarios de Protección Civil de Folgoso do Courel e dos servizos de mantemento da estrada.
Pouco despois, un dos feridos contactou co 112 Galicia e explicou que o seu acompañante estaba gravemente ferido e posiblemente atrapado no interior do vehículo, aínda que finalmente non foi necesario excarceralo e foi evacuado en ambulancia polos profesionais sanitarios.
