O PPdeG pon en valor o traballo dos alcaldes e alcaldesas máis novos do partido, na medida en que demostran «día a día» que a «política de calidade» e «pegada ao territorio» tamén vén da man dos máis mozos. Así, recoñécese a «responsabilidade, aprendizaxe e compromiso con Galicia» destas novas xeracións, valores «necesarios para atender á veciñanza nos concellos que lideran».
Así o manifestaron representantes do PPdeG no encontro de rexedores mozos celebrado en Baños de Molgas, onde unha ducia de alcaldes e alcaldesas mantiveron un encontro de traballo para poñer en valor os proxectos levados a cabo nos seus municipios. Ademais deles, tamén asistiron o responsable do Goberno galego de Presidencia, Xustiza e Deportes do Goberno galego e presidente provincial do PP da Coruña, Diego Calvo; a responsable de Vivenda e Planificación de Infraestruturas do Executivo autonómico, María Martínez Allegue, e o presidente provincial do PP de Ourense, Luis Menor.
Os populares recoñeceron no acto o labor dos rexedores menores de 40 anos e o das novas xeracións do PPdeG en xeral, «que traballan a diario para mellorar a vida da veciñanza». Así, fíxose referencia ao traballo feito polos alcaldes Ángel Pérez (Guntín), Gonzalo Louzao (A Estrada), Manuel Fernández Movilla (Baños de Molgas), Fernando Couce (Cabanas), Luis Insua (Fisterra), Pablo Graña (Xunqueira de Espadanedo), Álex Doval (Oroso), Melisa Macía (Vilariño de Conso), Pablo Barcia (Mondariz), Pablo Rivas (Portomarín), Jorge Cubela (Cerdedo-Cotobade), Esteban Ares (Lousame), María Sampedro (Ribeira), Rebeca Sotelo (Cenlle) e Miguel González (Baralla).
Dende o PPdeG destácase tamén a «valentía» destes mozos «ao dar un paso adiante e asumir o compromiso por mellorar a vida da veciñanza», fronte á política de «pancarta e conflitividade» que caracteriza á oposición.
FERNÁNDEZ MOVILLA: «UNIDOS CONSTRUÍMOS UN FUTURO MELLOR»
Manuel Fernández Movilla, alcalde de Baños de Molgas, exerceu como anfitrión do encontro. É un dos 15 alcaldes menores de 40 anos que ten o PPdeG en Galicia. No 2023 asumiu a alcaldía deste municipio con maioría absoluta e no 2027 «de seguro que seguirá mellorando a súa porcentaxe de voto», incidiron os populres. Con 33 anos é o rexedor máis novo da provincia de Ourense e o terceiro en Galicia.
Fernández subliñou o sentido destes encontros de traballo para «reforzar as relacións e dar resposta ás necesidades dos nosos veciños, especialmente no rural». «Estou convencido de que, se seguimos traballando unidos, imos seguir avanzando e construíndo un futuro mellor para os nosos municipios e para os nosos veciños», sinalou o alcalde de Baños de Molgas, poñendo en valor o «municipalismo» como unha das bases das políticas do PPdeG.
LUIS MENOR: «A POLÍTICA SEN ILUSIÓN É SÓ XESTIÓN»
O presidente do PP da provincia de Ourense, Luis Menor, dirixiuse aos alcaldes novos como «piares» do partido, xa que se trata de candidatos «activos, dinámicos, con ganas de mellorar as cousas, pero por riba de todo con interese real por defender a súa terra».
«A política sen ilusión é só xestión», dixo o presidente dos populares ourensáns, apelando tamén a mesturar a mocidade coa experiencia. «Vivides o voso tempo, falades a linguaxe de hoxe e comprendedes as novas necesidades, pero mantede sempre ao lado aos nosos veteranos», sinalou.
VIVENDA PARA OS MOZOS, PRIORIDADE DO GOBERNO GALEGO
Fronte ao «ruído e a conflitividade «do PSdeG e do BNG, o PPdeG traballa por dar respostas e oportunidades. Neste sentido, os populares lembran que son o partido máis votado pola mocidade en Galicia. Por este motivo, no encontro de traballo falouse de cuestións que resultan prioritarias para os mozos, como é o caso da vivenda.
O PPdeG lembra que a pasada semana, no Debate do Estado da Autonomía (DEA), o presidente do Goberno galego, Alfonso Rueda, deixou claro que o seu equipo traballa para dar facilidades aos mozos para acceder a unha vivenda. Así, entre as medidas máis novidosas anunciadas polo presidente, destaca a flexibilización do umbral máximo de renda para optar a unha vivenda pública ou a reserva destas vivendas en venda por idade: ao 25% para menores de 36 anos que xa reservabamos, súmase agora e o 30% para persoas de entre 36 e 45 anos con fillos ou dependentes.
Tamén se acordou impulsar a Estratexia Galicia Retorna. Trátase de medidas complementadas á súa vez por unha folla de ruta integral pensada por e para a mocidade en diferentes eidos, como o programa de ‘mentoring’ ou os incentivos ás empresas para a contratación de xente nova, entre outras.
